فى بلدنا كل الاشياء متفبركة ومتلغبطة
فى بلدنا كل شئ غلط ومعكوس ومقلوب ومهبب
المحاسب يعمل بياعا
والزراعى يعمل فى شركة كمبيوتر
والمحامى يعمل فى خدمة العملاء
واللصوص يعملون وزراء
وكلهم يعانون البطالة المقنعة
ويشتكون ضيق الرزق وقلة العلم
فى بلدنا تركب الاتوبيس فلا تستطيع حتى ان تقف
وتركب المترو فيتعطل بك تحت الارض ساعة كاملة حتى يختنق الناس ويلعنون اليوم اللى ركبو فيه مترو
فى بلدنا تدفع فاتورة التليفون فتقف طابورا
وتشترى الخبز فتقف طابورا
وتدفع فاتورة دى إس إل فتقف طابورا
وتتقدم لوظيفة فتقف طابورا
وتذهب لشراء ساندوتشات فول وطعمية فتقف طابورا
وتذهب للبنك فتقف طابورا
فى بلدنا تدفع فاتورة مقابل جمع الزبالة أتاوة وفردة
وتذهب وأنت اقل من ذلك لأقرب مقلب زبالة وتلقى بزبالتك وانت حاطط فى بقك جزمة
فى بلدنا أطول نهر فى العالم وفى بلدنا أكبر بحيرة صناعية فى العالم وبلدنا تطل على بحرين من أكبر بحار العالم الأحمر والأبيض المتوسط ونستورد السمك من الخارج
فى بلدنا السد العالى الذى ينتج الكهرباء بمليارات الميجاوات وفى عام 2007 وتوجد مناطق بأكملها سارقة كهربا
فى بلدنا 75 مليون إنسان يعيشون فوق بعضهم فى 4% من مساحة الأرض
فى بدلنا أتوبيس 17 الوحيد فى العالم الذى يضخ دخان العادم الى داخل الأتوبيس
فى بلدنا مرشحا تقدم لرئاسة الجمهورية عام 2005 وهو يرتدى طربوشا
فى بلدنا تنصب على الغلابة فتصبح ثريا
فى بلدنا تنصب على شركة فتصبح مليونيرا
فى بلدنا تنصب على بنك فتصبح مليارديرا
فى بلدنا اجيالا جت وراحت ولم تختار من يرئسها ويحكمها مرة واحدة
فى بدلنا أجيال جت وراحت ولم تفك الخط
فى بلدنا أجيال جت وراحت ولم تزق العز مرة واحدة لم تركب عربية واحدة ولم تزق طعم الكافيار والأسكلوب بانية
فى بلدنا أجيال أجيال جت وراحت
وتظل بلدنا كما
وإسمحولى بالمناسبة الكلام الجميل ده أقدم لكم مقطوعة زجلية
كتبتها من أكتر من عشر سنين الغريب الأخرس
*****
الغريب الاخرس لو جـــــه بلدنا
هيتكلم وينطق فيها ويقـــــــــول
وتتفك عندنا عـــقدة لســــــــانة
ويمكن يرجــــع بلادة مشلـــــول
ويمكن من اعجابة بسواد نهرنا
يروح رامى نفسة فيه على طول
وتتعب نفسيتة ده غير المــرض
هياكل جتتة ويرعى ويصـــــــول
ماللى هيسمعة ويشـــوفة عندنا
من بنات مهملة وشاب كســــول
وناس على بلاج المجارى عايمة
وبلاعة مفتوحــة زى بير بترول
ومية غســيل فى الســـما طــايرة
دلقتها عـليه الست ام سحلـــــول
وحلوة متشيكة عريانة ما تعرف
ولا لابسة ..أهــو زى ما تقــــول
وشعرها الاصفر الناعـــم بيغرى
احنا ف فرنسا ولا فى اسطنبـول
وشاب ماشى والسلسلة مدلـدلة
من رقبتــة .. وهو دلــــــــــــدول
وهيضيع الغريب فى البلــــد دى
بين حق اتسلب وحق مأكــــــول
وبين موظف يقبحلك الصبحيــة
ومنافق يشبعك كلام معســــــول
وخناقات ماشية والنبــوت فيـها
عامل زى سيف بالشر مسلــول
وهيضيع ما بين رقاصة معبودة
وعالم داير فى البلاد مجهـــــول
ورجالـــــة طويلـــة من هيافتها
ما يصدقها عقل ولا معقـــــــــول
ولو شاف الشحاتين فى بلـــــدنا
يستغرب من الشحات اللى قد الغول
رابط ايدية بخيشة ولا هدمــــــــة
وماشى يشحت والغريب مذهول
وتقول لمــــين .. وتشكى لمــين
ياعم ده العقل بالترباس مقفول
أحمد الصباغ
