ايه الريحة دى ؟ هو حد معاه جرنان حكومى ولا ايه

الاعلام الحكومى بدأ دورة المعتاد المغرض فى التضليل واتهام الدمايطة بانهم بيدورو على مصلحتهم الشخصية بغض النظر عن مصلحة البلد اللى هتتضر لو تم وقف بنا المصنع .. طبعا كلام عبيط وما يخلش على الشعب المصرى اللى شارب المرار

المدونة دى عجبتنى اوى وتعتبر المدونة الرسمية لكارثة دمياط ياريت كلنا نهتم ونقرا الموضوع عشان نبقى فاهمين ايه اللى بيحصل من حد صادق وبلاش نمشى ورا الاعلام الكذاب .. مدونة الدمياطى

قرار تقسيم المحافظات الجديد .. قرار عشوائى وقرار غير انسانى فى نفس ذات الوقت
عشوائى .. بدليل انه بعد ضم الواحات للمنيا اكتشفوا ان اصلا مفيش طريق بين الواحات والمنيا .. رجعو ضموها لـ 6 اكتوبر .. وبعد ضم المعادى لحلوان اكتشفوا عدم وجود المحكمة الدستورية العليا فى العاصمة رجعوا ضمو الكام متر بتوع المحكمة للقارة
وغير ادمى .. لان مفيش مراعاة للبعد الانسانى .. ازاى اهجر واحد من مدينتة اللى بيتعز بيها وبفتخر منها .. يعنى انا كنت بعشق القاهرة الفاطمية حتى النخاج .. دلوقت اعشق ايه .. حلوان الفاطمية ؟؟ حاجه زفت وقطران

ثم بشكر كل الاصدقاء اللى علقوا على البوست السابق معلش مقدرتش ارد على التعليقات نفر نفر بس بشكركم بشدة وعنف على التعليقات الجميلة.. بس فى تعليق من الصديقة القيثارة المكسورة اللى هى اختنا نيفين بتنتقد فيه انى صورت لقناة الحرة الأمريكية العميلة الجاسوسة اللى اتخلقت عشان تزيف الحقايق وتؤكد ان فلسطين يهوديه .. على حد قولها.. الحقيقة انا معرفش الصح فين .. ويمكن يكون كلامها صح .. لكن معلش اولا : انهى احسن انى اقول كلمة حق فى قناة امريكية ولا اقول باطل فى قناة مصرية وطنية عربية قومية من القنوات الحلوة بتاعتنا .. ثانيا بقى هو لاموأخذة الويندوز بتاعك ايه .. ايرانى ؟؟ وبلوجر اللى عاملين عليه مدوناتنا ؟؟ يوغسلافى ؟؟ والنت اصلا ده ابتكار ايه ؟؟ كولالامبورى ... لأ كله امريكانى فى امريكانى
انا معرفش موضوع التمويل الاميريكى ده حقيقى ولا اشاعات بس التعصب ضد قناة تموليها امريكى اظن مالوش معنى

بتدخل تعليقات مجهولة احيانا ورغم انى مش بحب التعليقات المجهولة بس مش بلاقى فايدة من النقاش والجدال مع تعليق مجهول مصر انه يخفى هويتة ويتنقد انتقادات غير موضوعية .. انا بقول الكلام ده بمناسة تعليق مجهول دخل يتخانق معايا عشان بوست قديم .. بس خلاص

مروة الزارع .. زى ما قولت كان حفل خطوبتها الخميس اللى فات وهى صرحت بنشر صور لها بس انا هنشر صورة واحدة بس .. هى المدونة سبيل ولا ايه هههههه ياللا ممكن فى الجواز انشرلها صورة ونص كدة

الاستاذ أحمد على .. صاحب يوميات عيل مصرى .. فاكهة المدونين وحبيب الملايين .. فى اتصال تليفونى بيوصل سلاماته وتحياتة لكل المدونين والمدونات .. المفاجأه بقى ان شاء الله بمجرد وصولة لمصربسلامة الله .. هعمل لقاء كبير عشان نلتقى بيه كلنا لانه بجد وحشنا اوى اوى

وأخيرا بقى .. فى ناس كتير بتعقد مقارنة بين المدونات والفيس بوك ؟؟ وبتقلل من دور المدونات وبتقول ان الفيس بوك سحب البساط من تحت المدونات .. واضح ان الناس دى مش فاهمة حاجة طبعا كلام غريب .. لازم يترد عليه وهرد عليه قريب .. بس خلاص

أحمد الصباغ

انا مع قناة الحرة فى حديث عن الفيس بوك والمدونات .. ومتفرقات

الحمد لله عدى يوم الجمعة على خير صورت يوم كامل لقناة الحرة لقاء عن الفيس بوك والمدونات .. كان يوم عصيب ومتعب اوى وعرفت أد ايه بيتعبوا الممثلين .. التصوير كان فى أربع أماكن .. فى ميدان الجيزة أمام برج الجيزة .. وفى مكتب القناة فى ميدان لبنان .. وفى غرفة نوم .. ما حدش يفهمنى غلط .. وفى كافية فى الزمالك

كان اللقاء عبارة عن تأثير الانترنت والفيس بوك فى حياتنا وعشان كدة المخرج فكر انى اصور فى الاماكن الطبيعية اللى ممكن ادخل فيها على النت واتابع الفيس بوك والمدونة وصورت وانا شغال على الاب توب وانا على السرير .. بالاضافة للأنترفيو وحديث عن الفيس بوك والمدونة وشرح ده على الطبيعة .. ثم انتقلنا لكافية سينابون فى الزمالك وانضمت لينا البت المدونة آبى وصورت لوحدها الاول انترفيو وبعدين صورت انا وهى لقاء مشترك .. وبجد كانت مشرفة ورفعت راسى مع المخرج
والحمد لله كان يوم ناجح جدا واتعلمت فيه كتير واستمتعت حقيقى بس اللقاء مش هيتذاع دلوقت عشان لسه بيجمعوا حاجات عشان يبقى زى برنامج وثائقى وان شاء الله قبل ما يتذاع هقول


دى صورة للوكيشن فى كافية سينابون مع أبى
أشكر الصديق احمد سوو اللى كان معانا فى الكافية وإلتقطت الصورة دى .. واشكر أحمد الجيزاوى على تشجيعة
-------------------
نوارة نجم بنت بمليون راجل .. ايوة بجد بحييها اوى على وقوفها دايما ودعمها لحقوق الانسان وتضمنها مع المعتقلين والمظلومين .. وهى مش بتتأخر ابدا انها تبذل اى حاجة تساعد بيها فى كل المواقف الحرجة .. وده رغم انها انسانة شرقية .. لكن بجد مش عارف ليه كل ما بفتكر نوارة بفتكر القول
وما التأنيث لأسم الشمس عيب .. وما التذكير فخر للهلال
-------------------
ان شاء الله بحضّر ريبورتاج حلو عن " مدونات مصرية للجيب " لجريدة نهضة مصر اللى اتصلت بيا انهاردة وعملت معايا حوار .. وان شاء الله ايام قليلة ويكون الريبورتاج جاهز .. هحاول اقعد بكرة قعدة كويسة مع توائم روحى البوهى ومهنى عشان نعمل الفنش الاعلامى ولازم كل الناس تشارك لأن الموضوع مش يخص فرد ولكن ده فخر بجد لكل مدون وهنعرف القيمة الذهبية لفكرة مدونات مصرية للجيب ... الجدير بالذكر ان نهضة مصر عملت حوارات مع الاصدقاء الثلاثى السكندرى شمعى أسعد وهناء صابر ومها عمر وان شاء الله سنوافيكم قريبا بالموضوع بالكامل
احم احم .. صباغ إن إن
-------------------
إسراء عبد الفتاح فى لقاءها على تسعين دقيقة و العاشرة مساءا انهاردة بدأت تسترد صحتها النفسية وبدأت تنطلق وتقول كلام يبسط ولما اتسألت هتعمل ايه بعد كدة قالت : انا مش عارفة هعمل ايه بالظبط بس الاكيد مش هحبس صوتى فى زورى وهعبر عن رأيى .. كويس
------------------
نزار قبانى واحمد فؤاد نجم .. الاتنين دول قريبين اوى من قلوب شباب هذا الجيل وانا شخصيا بعشقهم حتى النخاع بغض النظر عن بعض التحفظات .. المفاجأة بقى انى بأعد مجموعة ضخمة جدا من قصائدهم المشهور والنادرة واللى اتغنت وهتلاقوها متوفرة قريبا على المدونة
------------------
باركولى اتعلمت موفى ميكر كويس ودلوقت بأعد اتنين فيلم وثائقى قصير .. واحد عن المدونة بتاعتى فيلم تعريفى بالمدونة .. والتانى عن المدونين .. استعرض فيه صور ونبذة عن انشط المدونين اللى عنده اى مادة او لقطات فيديو يحب يساهم بيها .. هنيالك يا فاعل الخير والثواب
------------------
الفيس بوك أضاف خدمة الدردشة المباشرة حديثا من حوالى يومين والحقيقة دى قفزة كبيرة اوى للفيس بوك واظن لو طور فيها.. كدة هيتحول لحوت كبير يبتلع برامج الشات الاخرى ..
---------------------
مروة الزارع .. اتخطبت وكان حفل الخطوبة والشبكة يوم الخميس الماضى .. وعشان ناس كتير كانت بتسأل ..أقول هى اتخطبت لصديق من خارج الوسط التدوينى هو الاستاذ محمود عباس .. وكانت عروسة امورة اوى .. الف مبروك يا مروة .. لو إديتنى تصريح هنزل صور حصرية للحفل
ياللا بقى .. اتجدعنوا لازم افرح بباقى المدونات .. وأشيل مخاليلهم قصدى عيالهم كمان
---------------------
تحديث : أفرجت السلطات السعودية دلوقت عن المدوّن فؤاد الفرحان بعد أربعة شهور قضاها بالسجن .. وطبعا التهمة معروفة هى دعم مدونتة للاصلاحات السياسية فى السعودية .. والله المدونين فخر فى كل مكان وكل بلد

أحمد الصباغ

شالوا العاصمة من تحتى

طول عمرى بحلم انى انقل من القاهرة واروح مدينة هادية لكن عمرى ما كنت أتخيل انى اصحى من النوم ألاقيهم شالوا القاهرة من تحتى .. أى والله عملونى فى محافظة جديدة إسمها " محافظة حلوان " ... أووووع لامؤاخذة ده صوت واحد بيرجع .. حلوان دى كانت لا تمثل لى اكتر من أبو رجيلة بتاع المكرونة .. رايح فين .. رايح حلوان .. تعمل إيه .. آكل مكرونة من عند أبو رجيلة .. وأروح أطلب طبق وأقولة كتّر التقلية .. أَضرب الطبق وأرجع .. هى دى حلوان يا عبلة . إنما الوقت أصبحت جمهورية حلوان العربية هى كل كيانى ، أكتبها فى البطاقة ، وأفتخر بيها ، وأقول بكل ألاطة " حلوانى يا بية " .. سبحان مغير الأحوال أو بمعنى أدق " سبحان مصبر الوحش عالجحش " .. أنا عارف إن نومى تقيل بس مش لدرجة إنهم يشيلوا العاصمة من تحتى .. وبكدة فى إحتمال أصحى فى يوم ألاقى نفسى فى بلد تانى

دلوقت بس حسيت بإحساس الناس فى فلسطين وف روسيا قبل وبعد التقسيم وف البوسنة والهرسك ويوغوسلافيا وتشيكوسلوفاكيا وأد ايه اللخبطة اللى كانوا فيها مع الإنفصال وإعادة التقسيم والإتحاد مرة تانية .

محافظة حلوان .. تصدقوا شغال بردة . . يعنى طول عمرى أسمع جمهورية إمبابة ، أو امبراطورية صفط اللبن ، إنما محافظة حلوان دى ماكانش فى حد بيفكر يدلعها جه اليوم اللى بقت سيرتها على كل لسان .

الطريف بقى ان إخواتنا - أبناء الصمت – فى محافظة 6 أكتوبر ماهو عقبال عندكم 6 اكتوبر بقت محافظة .. بيمرو بنفس اللحظات الأليمة يعنى واحد ساكن فى الهرم صحى لقاهم شالوا الجيزة من تحتة .. طب والنبى يا جماعة كل واحد أما ينام يبقى يتبت فى المحافظة اللى نايم فيها ... وعجبى

أحمد الصباغ

اسراء خرجت

مبروك لخروج اسراء
ومش ناسيين باقى المعتقلين

تحــــديث

الاجابة المفيدة على السؤال عند نوارة

افرج عن مصر يا ريس

امبارح كان الريس .. قصدى ريس الوزرا .. احمد نظيف فى احتفالات مئوية جامعة القاهرة

وكان عمال يسترجع ذكرياتة - اللى معرفش حلوة ولا مريرة - مع جامعة القاهرة
وفجاءة
قاطع رئيس الوزرا طالب
«الجامعة زي الفل والعملية التعليمية زي الفل ورغيف العيش والديمقراطية موجودة
والحديد موجود، طيب مصر حزينة ليه يا ريس؟والشباب معتقلين ليه من يوم 6 أبريل؟ افرج عن مصر يا ريس
افرج عن مصر يا ريس»، وقوبل كلام الطالب بتصفيق حاد من زملائه الحضور

ده كان الشاب الرائع .. بلال دياب

وطبعا مفيش ثوانى بعد خروجة من القاعة

وتم احتجازة لمدة ساعة فى مكتب الأمن

وبعدين خرج والله اعلم بعد كدة هيحصل ايه

لله درك يا بلال

صدقنى يابنى كلمة حق فى الموقف ده

هيفضل التاريخ يذكرك

أخوك : أحمد الصباغ

--------------------------------------------

لرؤية الصور هنا
www.sabbagh100.googlepages.com/sb1.jpg
www.sabbagh100.googlepages.com/sb11.jpg

إقرأ المزيد عند نوارة نجم

لماذ سافر مهندس مصرى ؟

مهندس مصرى واتخنق مالبلد
لكنه بيحبها
شرب كما شربنا
من حنانها وحبها
وداق كما دَقنا المرار على أرضها
محمد قنديل .. المدوّن المصرى الرائع
الذى أعطى للتدوين - على الأقل بالنسبة لى - طعما جميلا
والذى حملت مدونتة اسم
"مهندس مصرى قرفان بس بيحب مصر"
سافر انهاردة بحثا عن رزقا أفضل
والحقيقة الصور اللى فوق دى
انا اخدتها لما كنا مع بعض فى يوم قضيناه مع مجموعة بلوجرية
وكنا بجوار جامعة القاهرة
شوف بقى كراسى الانتظار بجوار جامعة القاهرة شكلها ايه
اللى بتعبر عن حال البلد
وعن حالة الاهمال اللى بتعانى منها مصر على يد شلة من رجال حكموا مصر تلاتين سنة
ولم يجد مهندس مصرى سبيل سوا الا ان يجلس على بقايا الكراسى وهيا بالحالة دى
وده مثال صغير يجاوب على السؤال
لماذا سافر مهندس مصرى
فإلية فى غربتة أقول له
هتوحشنا كتير
وهنتحرم من قعداتك الجميلة
لكن سنظل معك فى مظلة التدوين التى ضمتنا
وتعود لنا بالسلامة يا محمد

عدسة : أحمد الصباغ .. على غفلة

تعليقات وخزعبلات

تتميز المدونة عن اى موقع عادى بوجود إمكانية التعليق على الموضوع

ودى مش مجرد خاصية للمنظرة بالعكس

دى بتدى التدوين روح جميلة من التواصل

لكن فى ظاهرة لذيذة اوى

ان بعض المدونين بيكتبوا فوق مربع التعليقات

بعض ملاحظاتهم على الشروط اللى بيتمنوها فى التعليق

مثلا من الملاحظات الطريفة ملحوظة آبى

بلاش الفاظ مش كويسه ، علشان مضربش بقله فى الدماغ على طول وانت الجانى على نفسك

ولا شوفو البت أجدع بنوتة كاتبة ايه

مـش كـده ولا ايـه ، على فكره .. لو كلمتين شتيمه هيريحوك ويفكوا عنك

فمتحرمنيش م الثواب دى .. انى اكون سبب ف راحة اخويا الانسان ابو لسانين

ههههههههههههههه

وتلاقى مثلا بطوط الحبوب كاتب

قول يا سيدى قول

أما بقى ملك الكبدة ده حكاية تقريبا كاتب نبذة عن حياتة فوق مربع الكومنت

يا ريت التعليق يكون ليه علاقة بالموضوع

انتقدني زي مانت عايز بدون الفاظ موش ظريفة من فضلك

لاني هضطر ارفض التعليق و ساعتها هحس بتانيب الضمير لاني ليبرالي موت

اه يا ريت بلاش تعليقات من نوعية شاركنا موش عارف في حملة ايه

و طريق الهداية و الحبشتكانات دي البلوج ده ليبرالي اجتماعي سياسي فقط

جامد جدا

أما بقى جمعاوى روش طحن فكاتب كلمتين كدة يصحصحو الضمير المكوع

علىّ صوتك و إنت بتكتب ..و ما يهمكش بس خد بالك ..ما يلفظ من قول ....كمل إنت بقى

مهندس مصرى كتب

شرفنى بتعليقك

وتكتب صاحبة أخر العنقود فوق مربع التعليقات كلمتين بعدهم علامات استفهام

رأيـــك يهـمنــى؟؟؟

يعنى ده سؤال ولا ايه ؟ .. ولا ملحوظة

هههههههههه

صاحبة مدونة حماتى ملاك كتبت

أدخل بإيدك اليمين

أما نورة الخشن فدخلت دخلة ايمانية عميقة

قال الله تعالى: { مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ } سورة ق الآية 18

أما نوران الشاملى كتبت

إوعى حد فيكم يكتب شتومة انا بزعل على فكرة

رغم كدة بتاخد شتايم أسود من قرن الخروب

لدرجة ان وقت كتابة المقال ده كانت قافلة امكانية التعليق فى مدونتها

أصدقاءنا الجعفرى واليعقوبى بيطلبو طلب قبل ما تعلق وهو

جدد نيتك قبل ماتعلق وضيف جديد

صديقى أدم المهدى كتب

أضفى علينا من تعليقاتك الباهرة

اما سوما صاحبة مدونة مجنونة فى بلد عاقل كتبت

مبحبش البلطجه ولا بحب السكوت
علق وقول اشتكى سمعنى اعلى صوت

ترررررا

حسام يحيى صاحب مدونة صوت الحرية كتب

الناس الحلوين اللى بيعلقوا

ولولا صاحبة صاحبة مدونة القادم أجمل كتبت

قول اللي في نفسك
قول و لا يهمك
اديها نعناع و قول ما تقول
بس متنساش
ربك شايفك علي طول

وصديقتنا الجميلة سارة سورسارة كتبت

إن لم تزد على الحياة شيئاً فأنت زائدٌ عليها

الدكتور الحر .. محمد أبو زيد كتب

زد الموضوع جمالا بتعليقك

دكتور أحمد صاحب مدونة موجة كتب

و إذا رأيت نيوب الليث بارزة ... فلا تظنن أن الليث يبتسم

دكتورة اجدع بنوتة كتبت

مـش كـده ولا ايـه.. ده حتى الاختلاف ف الراى .. لا يفسد للوز مهلبيه.. اه والله

همس صاحبة مدونة مصرية لكن متغاظة كتبت

اتفضل زى الباشا كدا قلى رايك ...لحد ما اجبلك حاجه ساقعه حالا..

والحقيقة اغرب حاجة شوفتها فوق مربع التعليقات انا مش هقولها عشان صاحبها ما يزعلش بس كان متشدد جدا وفارض شروط صعبة اوى على الزوار اللى بيفكرو يعلقوا

وانا فكرت انى أهدى النصايح الذهبية دى للمدونين المتزمتين دول

عن طريقة كتابة الملاحظات فوق مربع الكومنت

ممنوع منعا باتا كتابة تعليق قبل قراءة الموضوع عدة مرات .. لا تقل عن خمسة

ممنوع منعا باتا كتابة مدح او ذم او نقد غير موضوعى او نقد غير بناء او نقد ساخر أو نقد جارح أو انتقاد أو جدل أو نقاش أو أسئلة سخيفة أو أسئلة غير مريحة أو كلامى إنشائى أو ما شابه ذلك

ممنوع كتابة أى تعليق لا يتفق مع تعاليمات الدين الاسلامية أو المسيحية أو اليهودية أو البوذية أو الوثنية أو الالحادية أو السيخية أو أى عقيدة دينية سماوية أو أرضية

تقوم إدارة المدونة بنعل سنسفيل جدود أى تعليق لا يتفق مع اخلاقيات المدونة او مع تعليمات المدونة أو مع سياسة المدونة أو مع مزاج صاحب المدونة

ممنوع التجريح فى اى من اصحاب التعليقات الأخرى وفى حالة التجريح فى صاحب تعليق اخر تقوم المدونة بمسح التعليقين ونعل سنسفيل جدود اصحاب التعليقين

ممنوع وضع تعليقات تحتوى على أخطاء املائية أو نحوية أو نفسية أو منهجية أو راديكالية

ممنوع منعا باتا وضع تعليق طويل يزيد عدد حروفة عن خمسين حرف

ممنوع منعا باتا وضع تعليق قصير تقل حروفة عن تسعة واربعين حرف

ممنوع وضع تعليق يزيد عدد النقط على الحروف عن خمسة وتلاتين نقطة

اذا لم يلتزم الزوار بالتعليمات السابقة يحق لصاحب المدونة مسح التعليقات بدون إبداء أسباب وتوجية الشتيمة للمعلقين غير الملتزمين

عزيزى المدون اسمع نصيحتى وحط التعليمات دى فوق مربع التعليقات

واوعدك مفيش واحد يوحد الله هيدخل مدونتك تانى

وابقى ادعيلى

طيب ياريت كل واحد يقول نفسة فى ايه بخصوص التعليقات

نسمع كدة ؟

أحمد الصباغ

الفيس بوك .. والسياسة

حضرت يوم السبت الماضى فى جريدة الدستور مع مجموعة من الأصدقاء والمدونين ندوة عن موقع الـــFacebook وعلاقتة بالعمل السياسى .. والحقيقة الندوة كانت رائعة وغطت كل الأراء وخاصة فى ظل تنوع الشخصيات والأفكار ، وكانت تغطية الندوة فى العدد الاسبوعى الاربعاء 16/4/2008 فى تلات صفحات كاملة

الحاضرين بالندوة : أحمد الصباغ - شمعى أسعد – وسام الزحلان – أحمد ماهر – محب عبود – عزة مطر – احمد بدراوى – محمد هانى – محمد قنديل – نوران عادل – نيفين إمام – محمد زكى الشيمى – أحمد التيتى – كريم الصياد – محمد البسيونى – محمد صبرى – محمد العسقلانى - نوران الشاملى - محمد أبو زيد – أسامى درة - محمد الجارحى – حسام الهندى .. وأدار الندوة : محمد الدسوقى رشدى

أنت مشترك فى الفيس بوك ؟

إذن انت لديك ملف قد يضم صورتك وإيميلك وموقعك او مدونتك

وقائمة أصدقائك وربما تليفونك ومعلومات اكثر

اى ان الفيس بوك بيت زجاجى

يرى فيه الشخص غرف ودواخل كل المحيطين به

وربما يمثل صندوق الرسايل

درج صغير لا يرى ما بداخلة المحيطين بك فى الغرف الزجاجية الأخرى

الولد الأمريكانى اللى عمل الفيس بوك كان هدفة اجتماعى

وهو ربط زملائة فى الجامعة بطريقة تتيح تبادل الصور والمعلومات

ولم يفكر وقتها ان الموقع سيصبح أكبر موقع إجتماعى سياسى فى العالم

تستخدمة شعوب للتعارف ، وشعوب لتبادل المعلومات

وشعوب اخرى تعانى من مظاهر الديكتاتورية

تستخدمة فى ادارة وتنظيم اضرابات او ندوات او لقاءات

والكلام كدة بيقودنا لإضراب 6 إبريل

ببساطة الموضوع بدء عندما قرر عمال المحلة عمل اضراب يوم 6 ابريل

ثم تحول الموضوع من حالة فردية لعمال المحلة

الى إتفاق شعبى موحد من كل فئات الشعب

وكان فى عدة أشياء ساعدت على التوثيق الاعلامى للاضراب

وان كانت المدونات والموقع الخاصة وحركات واحزاب المعارضة

ساهمت بدور كبير فى الاعلان والتوثيق الرسمى للاضراب

فإن الفيس بوك قام بالدور الاكبر فى التوثيق الاعلامى

عندما قررت إسراء عبد الفتاح وزملائها انشاء جروب على الفيس بوك

يحمل اسم اضراب 6 ابريل

وسرعان ما وصل عدد المنضمين الى الجروب الى اكثر من 65 ألف عضو إبان الاضراب

واخيرا فان اعتقال اسراء الذى تم بعد الاضراب قد لفت الانظار الى أهمية الفيس بوك

والى دورة السياسى القوى فى تنظيم العمل السياسى

حجب الفيس بوك

الفيس بوك حجبتة دول لأسباب عسكرية

وحجبتة دول خوفا من تدميرة للبنية الاجتماعية

واختلفت الاسباب ولكن يظل الفيس بوك واحد من أهم المواقع على الشبكة الانترنت الان

لكن فى بعض الدول فضلت حجب الموقع مثل إيران وسوريا

فى سوريا إستيقظ الشباب على قرار الحكومة بحجب الموقع عن سوريا
وهما اصلا متعودين على كدة مع المواقع الغير صديقة للحكومة
لكن ما كنش حد يتصور ان الفيس بوك يتم حجبة بالكامل وبدون سابق انذار

الفيس بوك واسرائيل
وقريت الايام اللى فاتت ان اسرائيل أقامت حظر على الفيس بوك
وقال مسئول إسرائيلي لشبكة " بي بي سي" : هناك أشياء لا نريد الجمهور أن يراها
ويشمل الحظر صور طيارين بزيهم العسكري وأعضاء القوات الخاصة والمناورات العسكرية.

وكانت وزارة الدفاع الاسرائيلية قد أجرت تحقيقا في إمكانية
أن تشكل بعض الصور المنشورة على الموقع خطرا أمنيا
حيث اتضح أن بعض الجنود العسكريين
يضعون صورا من خدمتهم العسكرية على الموقع

وقال مصدر أمنى إسرائيلى اتضح إن عمليات تصويرغير مسموحة
قد جرت في قواعد القوات المسلحة بما فيها القوات الجوية
يعتقد أن نشطاء فلسطينيين ولبنانيين يراقبون مواقع مثل فيس بوك
للحصول على معلومات عسكرية اسرائيلية

يعنى الموضوع كبير أوى
أتمنى تقرا التغطية اللى عملتها جريدة الدستور فى عدد الاربعاء 16/4/2008م

كمان انا رفعت بعض المانشيتات والصور المنشورة ومقتطفات على جوجل بيدجز

مانشيت
صورة 1
صورة 2
صورة 3
صورة 4
صورة 5
صورة 6
صورة 7
صورة 8
صورة 9
صورة 10
صورة 11

تغطيات أخرى للندوة عند
مهندس مصرى
شمعى أسعد

حفل توقيع كتاب المدوّن .. إبراهيم عادل

" أصدقائى المدونين .. منحتونى الكثير من الحب والحلم والحرية "

بهذة الكلمات يبدأ إبراهيم عادل .. أو ابراهيم "معايا" كتابة .. المسحوق والأرض الصلبة

الذى كان حفل توقيعة فى مكتبة عمر بوك ستورز يوم الجمعة الماضى 11 إبريل

وحضرة مجموعة كبيرة من المثقفين والكتّاب والمدوّنين

والحقيقة يا جماعة ان المناسبات السعيدة والتاريخية دى للمدونين

انا بعتقد انها هى روح التدوين

وبالذات لان ابراهيم عادل بدأ حياتة الأدبية كمدون

صحيح هو انضم لمجموعة مغامير لكن هو نفسة بينسب الفضل الاول للتدوين فى اكتشافة كأديب

إبراهيم عادل .. صاحب مدونة أنا وأنا .. أو أبراهيم محمد عادل محمود أبو زيد من مواليد الجيزة 6/12/1981 وحصل على ليسانس الآداب من جامعة القاهرة عام 2003 ويعرف نفسة على انه عضو ( عامل ) فى مجموعة مغامير الأدبية

والآن مع بعض صور حفلة التوقيع

الوليد الأول لإبراهيم عادل

تقديم جيد للكتاب .. وشهادات أصدقاء إبراهيم على شخصيتة الأدبية

إبراهيم عادل .. والمدونين

الصباغ .. والرجل المسحوق فى الأرض الصلبة .. إبراهيم عادل

أنا .. وأشرف توفيق أخف دم

أنا .. ويوسف المصرى .. جارى العزيز

إبراهيم عادل .. وأشرف توفيق

إبراهيم .. يوقع لى نسخة الكتاب

إبراهيم عادل ولحظات من السرحان مع الإبن الأول

حضور جماهيرى كبير .. وإعجاب من الجميع بالكتاب

المدونين دائما معك

سوو .. محمود الدوح .. محمد مدحت

وهكذا .. فإنه يوما بعد يوم .. يكتشف التدوين نجوم إبداعية فى كافة المجالات الإبداعية الأدبية والشعرية والفنية والساخرة .. والى لقاء مع مدوّن جديد وكتاب جديد

ويارب تكون التغطية ظريفة وبالمناسبة كل الصور انا حملتها على الفيس بوك

لرؤية باقى صور الحفلة .. إضغط هنا

أحمد الصباغ

خطوبة فى المعتقل

خبرين على هامش الاضراب

أولا انا بعتذر عن الغياب لفترات عن الكتابة والتعليق والرد على التعليقات وذلك بسبب وجود عده لقاءات ومناسبات .. حفلة كتاب ابراهيم عادل وتغطية الحفلة تحت الاعداد وقبلها لقاء المدونين .. وندوة الدستور عن الفيس بوك ومن قبلهم يوم التبرع بالدم وغيرها فسامحونى للتأخير

---------------------

وخدوا الخبرين دول على هامش الاضراب الأول من داخل سجن المرج جالى انهاردة انقلة كما هو

إبراهيم مصطفى المعتقل على هامش اضراب 6 ابريل بسجن المرج طلب يد المحامية بتاعتة رباب رفعت

طلب من المأمور وأهلة وأعلن خطوبتهم على الملأ أمام المساجين

اقدم خالص التهانى لهما ويارب يفك أسرة

----------------------

الخبر التانى : جلسة استئناف باكر محكمة جنوب لكل من

ابراهيم مصطفى - اسراء عبد الفتاح - صبحى على - احمد بدوى - شادى العدل - محمد عبد التواب - ياسر اسماعيل

أحمد الصباغ

ونجح الإضرااااااااااااب

السماء بدأت الإضراب

فى منتصف ليل القاهرة ، انتفضت السماء عن عاصفة ترابية قوية وغيوم وكأن السماء تعطى إشارة البدء لأول إضراب جاد وناجح فى تاريخ مصر الحديث وتباركة وتصب غضبها على الظالمين ، امتد الاضراب عبر كل شبر فى مصر من القاهرة للمحلة للاسكندرية ، وان تفاوتت حدتة ومظاهره من مكان لآخر ، وشهد الأمن المصرى لحظات الفزع
يقول الخبراء : إن نجاح الاضراب بنسبة 40 % علي مستوي جميع المحافظات مما يعتبر نجاح غير مسبوق
أجمل فى فى الموضوع ان وسائل الاعلام العالمية تناولت الموضوع ان الشعب المصرى هو اللى قام بالاضراب لا جماعة ولا حركة ولا حزب لاول مرة وحتى مع توارد اخبار من ايام عن عدم تضامن جماعة الاخوان المسلمين مع الاضراب الا انهم فعليا شاركو فى الاضراب والساعة عشرة بالليل عرفنا ان محمد عبد القدوس انضم لقائمة المعتقلين التى تجاوزت 200 شخص فى القاهرة فقط وفى ناس كلمتنى من دمنهور ان فى اعداد كبيرة هناك

إضراب القاهــــرة

الزمان : الساعة 11 صباحا

ميدان طلعت حرب فيه حوالى 4 كتايب امن مركزى
بالاضافة لعشرات من عربيات الامن المركزى فى المنطقة ما بين ميدان طلعت حرب وميدان التحرير على الشمال وانت رايح التحرير بطول الشارع
سلم المترو بميدان التحرير امام كنتاكى يعج بعشرات المخبرين
والتفتيش يتم بدقة داخل وخارج المترو
وفى جميع مداخل ميدان التحرير
معظم محلات وسط البلد مغلقة

كان فى محاولات لتظاهرات متعددة بس كانت بيتم تفريقها قبل ان تبدأ
حشود الامن المركزى فى عبد المنعم رياض اشبه باللجان بيقفوا الناس وبيطلبو البطايق
الكاميرا كانت هتتسحب منى ظابط كبير قاللى شيل الكاميرا دى أحسن ناخدها .. انا طبعا رغم انى مشيت من الميدان بس بردة خفت ليشيلو العدة

المتظاهرين يهتفون

بلا احزاب بلا تعبير .. احنا بناكل لحم حمير

يا ابن الريس يا جمال .. مش لاقين اكل العيال

عاوزنها ثورة شعبيه .. ضد مبارك والحرامية

وقوات الامن تطلق القنابل المسيلة للدموع على نقابة المحامين بالقاهرة

قائمة من مركز هشام مبارك لحقوق الإنسان

للمعتلقين اليوم في القاهرة و الاسكندرية و المنصورة.. إضغط هنا

قامت قوات الأمن بإعتقال كل من أكرم الإيراني وحسن عبد الله وأحمد سعد دومه ومالك مصطفي ، الناشطين في حركة كفايه ، وذلك أثناء توزيعهم بعض البيانات في منطقه مصر القديمه

صورة من عند الجيزاوى ، وحزب العمل

وسط البلد فى الصباح الشوارع فاضية
الصورة من عند محمود الدوح

إضراب المحلة الكبرى

إشتعل الموقف فى المحلة بصورة مفزعة ، تقدر تقول إن الاضراب كان أقوى ما يكون فى المحلة ، أنباء وردت عن حدوث ضرب نار حى وقنابل مسيلة للدموع وإعتقالات لرجال ونساء وأطفال امن مركزى وقوات خاصه وقناصه وتكسير لبوابات الشركه ، ومقتل 4 أطفال ، وحرائق فى احدى محطات البنزين واحد القطارات وعده إتوبيسات

فيديو إضراب المحلة

أنباء متنوعة وردت من المحلة

انباء من الزميل محمد مارو : المحلة تحترق غضبا بين الامن و المتظاهرين ، و الجرحي لا يعدوا ، امن مركزى وقوات خاصه وقناصه وتكسير لبوابات الشركه وقنابل مسيلة للدموع وحرق كاوتشات وتزقيل بالطوب وقنابل المولوتوف ... والعماااااااال انطلقوا

حرائق فى الاتوبيسات ومحطة بنزين

الشرطة في المحلة تستخدم الرصاص الحي ووصول مصابين بطلقات نارية الى مستشفى المحلة الى جانب المصابين بالاختناق من الغازات

الشرطة تعتقل المصابين الذين يذهبون للعلاج في العيادات الخاصة بالمحلة

الأهالي قاموا بإشعال النار في كاوتش السيارات و قاموا بإلقاء الحجارة على قوات الأمن ردا على إستخدام قوات الأمن للقنابل المسيلة للدموع و خراطيم المياة و إطلاق الرصاص

تم قطع كل الطرق من و إلى المحلة لتبدو من بعيد مدينة معزولة تحترق

و قام بعض الصبية بإلقاء الحجارة على نافذة سائق أحد القطارات فأصيب و توقف القطار و تم أخذه من قبل الأهالي كرهينة

تعاملت قوات الأمن بأقسى أنواع العنف مع احتجاج الأهالي وسلطت عليهم القنابل المسيلة للدموع ورصاص خرطوش وقنابل صعقة (تؤدي إلى شلل الأطراف). كل ذلك عن الضرب بالهراوات والملاحقة الشرسة

اغلاق كل الطرق المؤدية الى المحلة - طريق طلخا سمنود وطريق كفر الشيخ وطريق المحلة طنطا وتحويل القطارات بعيدا عن المحلة

الامن يحاول اقتحام مقر حزب الجبهه فى المحلة الكبرى بعد ان اعتصم به اكثر من 30 شخص بينهم اطفال
أنباء عن قطع التيار الكهربائي عن مدينة المحلة الكبرى

صور الجرحى والمصابين فى المحلة .. من مدونة لسه عايش .. أضغط هنا

الصور عن موقع 6 ابريل

الاضراب فى أماكن متنوعة

محاصرة مكتب حمدين صباحي (عضو مجلس الشعب) واعتقال خمس مواطنين بكفر الشيخ اثر خروجهم من مكتبه .. وهذا ياتى ضمن ما يحدث فى القاهره من اجراءات امنيه

الجالية المصرية فى ليبيا تعلن عن تظاهرة اليوم لتأييد الاضراب فى مصر‏

دلوقت بقى هقولكم نكتة حلوة
شوفوا الاهرام كاتب ايه بكرة واضحكوا

انتظام العمل بجميع مؤسسات الدولة ورفض الإضراب

خلو الشوارع والميادين بالقاهرة والمحافظات من المظاهرات

رفض الشعب المصري أمس بجميع طوائفه وفئاته دعوة بعض المغرضين إلي الإضراب عن العمل‏.‏ وشهدت مؤسسات الدولة حضورا مكثفا من جميع العاملين‏,‏ وحرصا كبيرا علي استمرار العمل‏,‏ وزيادة الإنتاج بصورة فاقت الأيام العادية‏.‏ وخلت شوارع المحافظات وميادينها ـ بما فيها العاصمة ـ من المظاهرات والوقفات الاحتجاجية‏,‏ لإسقاط الدعوات التحريضية‏

ههههههههههههههههههههههههههههه

مصادمات في المحلة واعتقالات بعدة محافظات مصرية
مصادمات عنيفة في مدينة المحلة الكبرى و قوات الأمن المصرية تعتقل العشرات في القاهرة وعدة محافظات لمنع تنظيم المظاهرات

موقع بى بى سى - أحسن تغطية لاضراب الشعب المصرى

: تغطيات رائعة للاضراب فى المدونات

مدونة 6 أبريل

تغطية نوارة نجم

تغطية وائل عباس

تغطية أحمد الجيزاوى

مدونة لسه عايش

تغطية مهندس مصرى

على اسم مصر

هنا القاهرة

حزب العمل

متر الوطن بكام

تغطية محمد مارو من المحلة

أحمد الصباغ

مدفع الإضــــراب .. إضراااااااااب

لما الفســـاد وقــّـفوه حـــارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم

شعر : أحمد الصباغ