أحمد فؤاد نجم فى حديث عن مدونات مصرية للجيب

كبير ثوّار الكلمة
عمنا الكبير الجميل
أحمد فؤاد نجم

فى حدث مهم جدا لكل من شارك فى انجاح كتاب المدونين
أول حديث له عن مدونات مصرية للجيب لجريدة الدستور

نص مقال عم نجم الفاجومى عن الكتاب

أنا لما اخدت الكتاب اياه من الواد الجميل ايهاب عمر ماكنتش اظن انى ح اعيش مستقبل مصر المحروسة اهو كتاب وخلاص .. اتارينى اسم الله على مقامكم كنت حمار ودى مش اول مرة الحمد لله . ومش حتكون اخر مرة لان على راى حجازى الرسام كلنا حمير ربنا وده مش عيب .. والحمار احسن من البغل والزحلفة والفار

روّحت البيت ياعمنا وقلت اشوف ايه اللى بيكتبوه العيال بتوع النت اللى اطلق عليهم الاعلام الرسمى اسم المدونون واللى صنفهم اجهزة الامن العربية فى خانة " مثيرى الشغب" اللهم احفظنا واللى اصدرت عليهم بعض المحاكم احكاما بالسجن المشمول بالنفاذ .. وفتحت الكتاب : " الى المغتربين خارج مصر وداخلها نهديكم كلماتكم" .. يعنى دول بيكلموا حوالى تمانية وسبعين مليون فى عين العدو ونطلّع منهم الحكومة والاضيشها قول مليون ونص والباقى مغتربين برا مصر وجواها .. ده اول هام .. تانى هام بقى خفة الدم المصرية الحراقة اللى كانت اختفت فترة الابادة الجماعية للمصريين اللى بدأت بحرقهم فى قطارات السكك الحديدية ومرورا بإغراقهم بالعبارات المضروبة برضة ناهيك عن نظام السرطنة اللى نفذة باقتدار يوسف والى مزراحى ايام ما كان وزير زراعة - الله لا عاد يعودها- وتفضل اساليب الابادة الجماعية للمصريين ولا تنتهيش .. العيال دول بقى طالعين بخيرهم يعنى "بيور" وبيور دى انا سمعتها من واحد تاجر بودرة ويتحدث عن بضاعتة انا الاول اتفكرتها بيور جمع بير بالعامية المصرية زى جمع ديب بالعامية ديوبة لكن لما سألت واتقصيت قالولى بيور يعنى مش مخلوط ..أهى العيال دى مش مخلوطة وعشان كدة ناقلين كل الجينات المصرية واهمها خفة الدم وخد عندك مثلا مدونة "سكوت حنصوت " ..و"مدونة عايزة اتكلم".. و"مدونة البنت الشلبية" .. و"مدونة اهو دا عيبة".. و"مدونة بت خيخة واى كلام" ..و"مدونة بنوتة لاسعة"..و"مدونة يوميات عيل مصرى" ... وطبعا انا مش ح اقدر اقول كل المدونات لان عدم المؤاخذة المساحة ما تكفيش فما حدش يتقمص منى يا عيال والايام بيننا على رأى شكوكو وقال يا جحا عد موج البحر قال الجايات اكتر من الرايحات

تعالى بقى سيادتك لافتتاحية الكتاب اللى كتبها احمد البوهى اول هام حتفرح جدا جدا ان قضية فلسطين العربية والمغتصبة نايمة بالطول والعرض فى وجدان الجيل القادم بقوة لبناء مصر المستقبل يعنى لا صداقة السادات لمناحم بيجن ولا العلاقة العضوية بين مجرم الحرب قاتل الاطفال اللص الصهيونى المرتشى ايهود اولمرت وبين الرئيس مبارك او بين القاتل ايهود باراك وجمال مبارك قدرت تطرمخ ع القضة وتحولها الى كان كان ودو ده كان رهانى لما قولت لهم فى باريس عن اسرائيل هذا مشروع محكوم عليه بالفشل ويومها كان المذيع صهيونيا متعصبا وقال لى

انت الان تعترف بمعاداتك للسامية

ودى فى اوروبا وامريكا تهمة تساوى الزندقة فقلت له

وانت الان تعترف انك حمار لانك تتهمنى بمعادة السامية وانا سامى يا حمار يا صعيونى يا متعصب

ويختتم احمد البوهعى مقدمتة بالحديث عن كتاب المدونين قائلا : كتاب يسير فى اتجاة مواز لحرية الرأى والتعبير والمشاركة مهما اختلفت الاراء وتعددت الافكار وتناقضت الرؤى وتنوعت التجارب فى وطن واحد يكفى لان يستمع الجميع الى بعضة البعض وان سيشترك الجميع فى حلم بدايتة مساحة اتفاق وود حلم النهوض بهذا الوطن .. الكلام ده يا جدعان فى خطر امن الدولة ويستحق ان يحال لقضاء وتصدر ضدة احكام بالسجن المشمول بالنفاذ ؟ حد يفهمنى باعتبار غبى وجهول وحاقد وما اسواش بصلة ... والجميل فى الموضوع ان العيال المدونين دول فيهم مبدعين وشعرا بحق وحقيقى شعرا بالفصحى والعامية ودول مثالين الاول بالفصحى

المبدأ فى جيل الطمس

ما عادت ترغب فيه الشمس

يتوسط اجيالا حبلى بصراخ اليأس

يعلنها للناس جليا

يطويها للعالم طيا

بنى الارهاب على خمس

محمود موسى

بسم الله نصلى ع الحبيب ونقول توكلنا

ونتعاد يكون الحق رسمالنا

كلامنا اليوم عن الاوجاع عن اللى اتباع

وكام مليار بقول اجأة فى حجر بتاع

مالوش لازمة

احمد عصام

والبقية تأتى

اذا كان فى العمر بقية

---------

الى هنا ينتهى كلام عم نجم

الذى اعتبرة وساما على صدرى وعلى صدر كل مدوّن

وكل من شارك فى كتاب الشعب مدونات مصرية للجيب

وهذا الكلام اعتبرة شهادة تكريم لأبناء هذا الجيل ( البيور ) على حد تعبير عم نجم

ودى كمان خبر توقيع الكتاب فى جرنان نهضة مصر

تغطية الصديق العزيز الصحفى شعبان هداية

ويقول احمد البوهى

لم اتمالك نفسي من السعادة الطاغيه التي شعرت بها في قلبي و انا اقراء مقال عمنا احمد فؤاد نجم بجريده الدستور الصادره اليوم وهو يتكلم عن كتاب مدونات مصريه ويشيد به و بالفكره و بالمدونينين ووصفنا ان شباب جديد يحمل قلب و فكر جديد و لسنا مجرد عيال بتلعب و خلاص الي حد تعبيره

عندما يقوم شخص بحجم و مكانه عمنا فؤاد بالاشاده بينا و تشجيعنا فهذ اكبر دليل اننا بدانا نسلك الطريق الصحيح لخروج بالمدونات من العالم الافتراضي الي العالم الحقيقي لتسمع الدنيا كلها صوتنا

ادعوكوا لقراءه المقال في جريده الدستور الصادره بتاريخ اليوم 5/6

الموجود بالصفحه الخامسه تحت عنوان

بداية الرحلة

أحمد الصباغ

ملف عن التدوين فى جريدة نهضة مصر

ده ملخص الملف اللى وعدتكم بيه

هو الملف كبير خمس صفحات يتضمن حوارات
مع مدونين واراء رؤساء الأحزاب فى التدوين والمدونات
واراء رؤوساء تحرير الجرائد والمجلات بالاضافة الى تقرير عن حرية المدونين
وده مقتطفات من الريبورتاج

مع وائل عباس .. الوعى المصرى
تحميل

مع نوارة نجم جبهة التهييس الشعبية
تحميل

مع أحمد الصباغ
تحميل

مع شمعى أسعد قصاقيص ورق
تحميل

مع شاهيناز عبد السلام واحدة مصرية
تحميل

مدونات مصرية للجيب
المقال الأصلى هنا

المدونات هل تصبح بديلا للصحافة

تحميل

تقرير حرية الرأى والتعبير يكشف :
اعتقالات وملاحقات قضائية واحتجاز مدونين الكترونين بشكل غير قانونى

تحميل


وده جروب نهضة مصر على الفيس بوك

أحمد الصباغ

المدونون فى جريدة نهضة مصر

سورى حبيت افصل بين الخناقة مع بتوع روزاليوسف وبين البوست اللى فوق

--------------------

انهاردة جريدة نهضة مصر كتبت عن المدونين فى العدد الاسبوعى
وعملت حوارات مع عدد من المدونين منهم
أنا ونوارة نجم ووائل عباس وشمعى اسعد وشهيناز عبد السلام
ونزلت طبعا مقال عند مدونات مصرية للجيب
وكالعادة بهوات روزاليوسف وامثالها شنو هجوم على المدونات والمدونات
طبعا انتو شفتو الموضوع اللى عند نوارة هنا
وأد ايه الحقد والكراهية اللى شايلنها للمدونين
وكأن المدونين دول قاعدين فوق روسهم
كرم جبر بيقول : تأثير المدون وقتى .. مهما فعلوا
هههههههههه وكأن المدوّن ده مضاد حيوى
وكرد فعل عادل اظن من حق المدونين يشنوا حملة مضادة
ضد روزاليوسف وكل الصحافة اللى من النوعية دى
بس عموما الريبورتاج كان حلو وفى صالح المدونين
رغم محاولات بعض رؤوساء الاحزاب والصحفيين شن الهجوم على المدونين
اقروا العدد انهاردة -الخميس - العدد الاسبوعى

انتظروا الخناقة قريبا قريبا

انا والمدونين فى جريدة نهضة مصر عن اضراب 4 مايو

الصباغ واسراء عبد الفتاح والمدونين فى حوار عن الاضراب
كان هذا العنوان وإليكم الخبر بالتفصيل
هما اتصلوا بيا وبمجموعة من المدونين ونشطاء الفيس بوك وعملوا ريبورتاج عن رؤيتنا تجاة الاضراب
وبعدين انا رحت مبنى الجريدة امبارح الاربعاء عشان موضوع مدونات مصرية للجيب وتحمسوا للاعلان ودعم الفكرة
بس ما كنتش واخد بالى ان نهضة مصر مملوكة لشركة جود نيوز بتاعة عماد أديب
وواضح اوى من اسلوب صياغة الحوار انهم لهم توجه حكومى واضح
وانهم ضد فكرة الاضرابات بصفة عامة
والحقيقة انا من فترة ما كنتش متحمس اطلاقا لفكرة اضراب 4 مايو
وحسيت انه تكرار غير مبرر وعشوائى لاضراب ابريل
بس اظن دلوقت ان رؤيتى اتغيرت شوية وحاسس انه ممكن يعمل حاجة كويسة
انا شخصيا هيكون اضرابى سلمى هصلى كتير يوم 4 مايو زى ما قالت نوارة وهطفى النور واولع شموع زى ما قال ناس تانية على الفيس بوك

لتحميل نص المقال إضغط هنا

--------------
الإفراج عن سامى الحاج فرحنى زى ما فرح ملايين من العرب والمسلمين لكن احزنى وحسسنى بطعم المرارة الكلام اللى اتقال على الجزيرة من إن المعتقلين فى جوانتانامو بيصابو بالجنون من اللى بيشفوه ، المعتقل ده حقيقى وصمة عار لأمريكا وللمجتمع الدولى كله
إلى لقاء مع الكلام عن مدونات مصرية للجيب

أحمد الصباغ

انا مع قناة الحرة فى حديث عن الفيس بوك والمدونات .. ومتفرقات

الحمد لله عدى يوم الجمعة على خير صورت يوم كامل لقناة الحرة لقاء عن الفيس بوك والمدونات .. كان يوم عصيب ومتعب اوى وعرفت أد ايه بيتعبوا الممثلين .. التصوير كان فى أربع أماكن .. فى ميدان الجيزة أمام برج الجيزة .. وفى مكتب القناة فى ميدان لبنان .. وفى غرفة نوم .. ما حدش يفهمنى غلط .. وفى كافية فى الزمالك

كان اللقاء عبارة عن تأثير الانترنت والفيس بوك فى حياتنا وعشان كدة المخرج فكر انى اصور فى الاماكن الطبيعية اللى ممكن ادخل فيها على النت واتابع الفيس بوك والمدونة وصورت وانا شغال على الاب توب وانا على السرير .. بالاضافة للأنترفيو وحديث عن الفيس بوك والمدونة وشرح ده على الطبيعة .. ثم انتقلنا لكافية سينابون فى الزمالك وانضمت لينا البت المدونة آبى وصورت لوحدها الاول انترفيو وبعدين صورت انا وهى لقاء مشترك .. وبجد كانت مشرفة ورفعت راسى مع المخرج
والحمد لله كان يوم ناجح جدا واتعلمت فيه كتير واستمتعت حقيقى بس اللقاء مش هيتذاع دلوقت عشان لسه بيجمعوا حاجات عشان يبقى زى برنامج وثائقى وان شاء الله قبل ما يتذاع هقول


دى صورة للوكيشن فى كافية سينابون مع أبى
أشكر الصديق احمد سوو اللى كان معانا فى الكافية وإلتقطت الصورة دى .. واشكر أحمد الجيزاوى على تشجيعة
-------------------
نوارة نجم بنت بمليون راجل .. ايوة بجد بحييها اوى على وقوفها دايما ودعمها لحقوق الانسان وتضمنها مع المعتقلين والمظلومين .. وهى مش بتتأخر ابدا انها تبذل اى حاجة تساعد بيها فى كل المواقف الحرجة .. وده رغم انها انسانة شرقية .. لكن بجد مش عارف ليه كل ما بفتكر نوارة بفتكر القول
وما التأنيث لأسم الشمس عيب .. وما التذكير فخر للهلال
-------------------
ان شاء الله بحضّر ريبورتاج حلو عن " مدونات مصرية للجيب " لجريدة نهضة مصر اللى اتصلت بيا انهاردة وعملت معايا حوار .. وان شاء الله ايام قليلة ويكون الريبورتاج جاهز .. هحاول اقعد بكرة قعدة كويسة مع توائم روحى البوهى ومهنى عشان نعمل الفنش الاعلامى ولازم كل الناس تشارك لأن الموضوع مش يخص فرد ولكن ده فخر بجد لكل مدون وهنعرف القيمة الذهبية لفكرة مدونات مصرية للجيب ... الجدير بالذكر ان نهضة مصر عملت حوارات مع الاصدقاء الثلاثى السكندرى شمعى أسعد وهناء صابر ومها عمر وان شاء الله سنوافيكم قريبا بالموضوع بالكامل
احم احم .. صباغ إن إن
-------------------
إسراء عبد الفتاح فى لقاءها على تسعين دقيقة و العاشرة مساءا انهاردة بدأت تسترد صحتها النفسية وبدأت تنطلق وتقول كلام يبسط ولما اتسألت هتعمل ايه بعد كدة قالت : انا مش عارفة هعمل ايه بالظبط بس الاكيد مش هحبس صوتى فى زورى وهعبر عن رأيى .. كويس
------------------
نزار قبانى واحمد فؤاد نجم .. الاتنين دول قريبين اوى من قلوب شباب هذا الجيل وانا شخصيا بعشقهم حتى النخاع بغض النظر عن بعض التحفظات .. المفاجأة بقى انى بأعد مجموعة ضخمة جدا من قصائدهم المشهور والنادرة واللى اتغنت وهتلاقوها متوفرة قريبا على المدونة
------------------
باركولى اتعلمت موفى ميكر كويس ودلوقت بأعد اتنين فيلم وثائقى قصير .. واحد عن المدونة بتاعتى فيلم تعريفى بالمدونة .. والتانى عن المدونين .. استعرض فيه صور ونبذة عن انشط المدونين اللى عنده اى مادة او لقطات فيديو يحب يساهم بيها .. هنيالك يا فاعل الخير والثواب
------------------
الفيس بوك أضاف خدمة الدردشة المباشرة حديثا من حوالى يومين والحقيقة دى قفزة كبيرة اوى للفيس بوك واظن لو طور فيها.. كدة هيتحول لحوت كبير يبتلع برامج الشات الاخرى ..
---------------------
مروة الزارع .. اتخطبت وكان حفل الخطوبة والشبكة يوم الخميس الماضى .. وعشان ناس كتير كانت بتسأل ..أقول هى اتخطبت لصديق من خارج الوسط التدوينى هو الاستاذ محمود عباس .. وكانت عروسة امورة اوى .. الف مبروك يا مروة .. لو إديتنى تصريح هنزل صور حصرية للحفل
ياللا بقى .. اتجدعنوا لازم افرح بباقى المدونات .. وأشيل مخاليلهم قصدى عيالهم كمان
---------------------
تحديث : أفرجت السلطات السعودية دلوقت عن المدوّن فؤاد الفرحان بعد أربعة شهور قضاها بالسجن .. وطبعا التهمة معروفة هى دعم مدونتة للاصلاحات السياسية فى السعودية .. والله المدونين فخر فى كل مكان وكل بلد

أحمد الصباغ

هكذا قال المدوّنون .. فى الدستوووور

رجعت صفحة المدوّنات لجريدة الدستور

التى تولى المدوّنين إهتماما كبيرا

وتبذل مجهودا رائع فى إلقاء الضوء على الحياة التدوينية فى مصر

ويعود – كلام العيال البلوجرية – للمرة الثانية الى صفحة المدوّنات فى جريدة الدستور

والمقال ده كان خاطرة عن أحد البوستات اللى قريتها

والتعليقات اللى جت عليها

والمقال ده كنت كاتبة للدستور أصلا

يعنى ما نشرتوش قبل كدة

تعالوا نشوف المدونين قالوا إيه؟

النص الأصلى للمقال

التدوين هو سماء واسعة للبوح

وعندما تدوّن ربما تبوح بأشياء كثيرة لا تبوح بها لأقرانك وذويك

محمد أبو زيد .. صاحب مدونة دكتور حر

طرح موضوعا للنقاش حول ما يحبة المدونون من الدنيا

مستشهدا بحديث للرسول صلى الله عليه وسلم

.....
جلس رسول الله عليه الصلاة والسلام مع أصحابه رضي الله عنهم

وسألهم مبتدأ بأبي بكر : ماذا تحب من الدنيا ؟
فقال أبو بكر ( رضي الله عنه) أحب من الدنيا ثلاث
الجلوس بين يديك - والنظر إليك - أنفاق مالي عليك
وأنت يا عمر ؟
قال أحب ثلاث
أمر بالمعروف ولو كان سرا
ونهي عن المنكر ولو كان جهرا
وقول الحق ولو كان مرا
وأنت يا عثمان؟
قال أحب ثلاث
إطعام الطعام - وإفشاء السلام - والصلاة بالليل والناس نيام
وأنت يا علي؟
قال أحب ثلاث
إكرام الضيف - الصوم بالصيف - وضرب العدو بالسيف
ثم سأل أبا ذر الغفاري
وأنت يا أبا ذر : ماذا تحب في الدنيا ؟
قال أبو ذر أحب في الدنيا ثلاث
الجوع- المرض – والموت
قال له النبي (صلى الله عليه وسلم): ولم؟
فقال أبو ذر
أحب الجوع ليرق قلبي
وأحب المرض ليخف ذنبي
وأحب الموت لألقى ربي

فقال النبي - صلى الله عليه وسلم
وأنا حبب إلى من دنياكم ثلاث الطيب – والنساء - وجعلت قرة عيني في الصلاة
.....

ثم يعلن أبو زيد عن ما يحبة من الدنيا

النوم ، الماء البارد ، كتاب الله

.. ويتوالى الافصاح عما يحبة المدونون

يقول عصفور المدينة
أحب الميكانيزمات ، والوصلات ، وكيف تعمل الأشياء

وتقول فرنسا هانم
صوت الطفل ، تكبيره العيد ، الصحه

وتقول لماضة
قول الصدق ، كتاب الله ، عباد الله

يقول صاحب المضيفة
القران ، والدعاء ، وحب الجميل في كل شيء

وتقول آبى
أداء الامانه ، وعدم الكذب ، وحب الله ورسوله

ويقول إمام الجيل
الحب بين الناس ، وان اكون متعلقا بالله ، ان اكون انا

وتقول بت خيخة
مساعدة المحتاج باى طريقة وباى شكل، القراءة ، ضحكة شريف ابنى

وتقول ميرميد
السفر ، البكاء ، مساعدة المحتاج

وتقول د/أجدع بنوتة

النظر الى السماء ، ديننا بكل مافيه ، الاكل بكل انواعه

ويقول أبو الحسن
الصحبة الطيبة ، العلماء ، يوم يمر بغير معصية

ويقول قبس من نور
أحب من الدنيا : الماء ولحظة دعاء والحب في الله

ويقول خليفة
قضاء حوائج الناس ، إدخال السرور على الناس ، محبوباً من جميع الناس

وتقول رودى
الوطن ، الاحبة في الله ، العلم

وتقول صاحبة مدونة العمر لحظة
البحر من غير زحمه ، الناس تبقى لبعضيها ، الشيكولاته

ويقول مهندس مصرى
القراءة ، الإنترنت ، الأهل و الأصدقاء

يقول السيد شبل
إطعام المساكين ، الجهاد ، الصلاة والناس نيام

ويقول ابن حجر العسقلانى
أحب أن أكون سببا فى سعادة الآخرين ، أحب أن أكون بين الناس ، أحب الشعور بالأمان

وقال خالو أحمد
الإنترنت ، الأجهزة العلمية ( مجال عملى ) ، رسول الله صلى الله عليه وسلم

لأ شك ان التدوين قد أعطى فرصة لجيل من الشباب فى البوح بأسرار ربما لا تتيحها ناقشات الحياة اليومية كثيرا .. وأنا شخصيا أشعر ان التدوين والنقاشات التى تدور فيه جعلتنى أكتشف فى نفسى زوايا إنسانية جديدة

أحمد الصباغ
الدستور - العدد 154 -27 فبراير 2008م

أحمد الصباغ .. فى الدستووور

طلعنا فى الدستوووور

أنا والعيال البلوجرية .. طلعنا فى الدستور

مقال : كلام العيال البلوجرية

وأنا فرحان ان جرنان الدستور

الجريدة المستقلة الاولى فى مصر

بتدينا الإهتمام ده كله

إلى كل أصدقائى المدونين والمدونات

إكتبوا وعبروا

سطروا بأقلامكم تاريخ مصر القادم

أنتم ضمير الأمة فى هذا العصر

أكتب شعر

وارسم كاريكاتير

واكتب خواطرك

وأكتب مذكراتك وتجاربك

كل كلمة بتتكتب فى مدونة

وكل صورة

هى شاهد على عصر وشاهد على جيل

وشاهد على أهم فترات الحياة المصرية

وتحية الى كل مدوّن ومدوّنة

نص البوست الأصلى

كلام العيال البلوجرية

المجتمع البلوجرى قد أطلق لأول مرة عام 1999 الا انه لم يتخذ شكلة الحالى الا عام 2003 ثم شهد عام 2006 الصورة الحالية للتدوين وبدأت ثورة كبرى .. هى الثورة التدوينية واذا كان هناك عصر القنبلة الذرية وعصر السماوات المفتوحة فأنا شخصيا أسمى هذا العصر .. عصر التدوين و يوم بعد يوم بدأت تتضح ملامح المجتمع التدوينى وتتراص أفراد الأسرة التدوينية وبدأ هذا المجتمع فى الترابط والتماسك والتواصل بقينا نهنى بعض فى اعياد الميلاد وفى الأفراح والمناسبات ونعزى بعض فى حالات الوفاه بدأنا نفهم بعض ونتعرف على بعض اكتر بجد يا جماعة المجتمع التدوينى ده صار مجتمع عظيم لا يقل ابدا عن مجتمعات اخرى زى الصحافة والاعلام او الجامعات اصبحنا أبناء كار واحد اتضحت ملامحنا لبعض تعارفنا على أفراد الأسرة التدوينية عرفنا ان فلان عصبى وبراوى
وشايف النص الفاضى من الكوباية وساخط على الاحوال السيئة الموجودة فى بلادنا العربية وعلان هادى ومتكيف ومبسوط اوى وحاطط ايده فى ميه باردة وشايف النص المليان من الكوباية وتبتان متدين وهمة الشاغل هى القضايا اللى بتمس دينة وفلانة بيتوتية اوى ورومانسية وبتحب كل الناس وبتكتب من قلبها وعلانة وطنية ومتحمسة للبلد وهكذا وانا شخصيا بدأت اعرف مجموعة كبيرة من الاصدقاء المدونين اللى كلهم ..فعلا.. ينطبق عليهم قول رب أخ لك لم تلده أمك ولقيت فيهم وفى كتابتهم وتعليقاتهم وجبات روحية يومية !تشبع الروح الصحفية الكامنة فى معاميقى و تملى الحياه الرتيبة الكئيبة الجافة لقيت فيهم المرح والجدية والحماس والسخط والعمق والطفولة والحب والاخلاق النبيلة واظن كلنا حسينا بنفس الشعور أظن فعلا احنا بقينا أبناء كار واحد زى النجارين والصحافين والمهندسين والدكاترة لما تقول لدكتور .. تعرف الدكتور فلان ؟ يقولك آه مش اللى فاتح على أول الشارع اللى جنبنا ده باطنى شاطر وكشفة بكذا وعنده ولد فى كلية كذا واخوة اسمة كذا وأمة أصلا كانت داية وبيعمل عمليات فى مستشفى كذا اهو انا بقيت كدة لما تسألنى عن مدون أقولك اه ده صاحب مدونة كذا وفى كلية كذا وغاوى ندوات او بيحب الرسم أو الشعر و كان عامل معرض فى الحتة الفولانية عشان حكالنا مرة عن المعرض ده
ويوم بعد يوم المجتمع التدوينى بيكبر وبنرتبط ببعض اكتر وبنفهم بعض اكتر صحيح فى تكتلات تدوينية لان تقريبا فى حوالى 20000 مدونة مصرية واكيد مفيش حد قدر يزور ويحصر كل المدونات فحصلت بعض تكتلات ساعات ادخل مدونة جديدة الاقيها جميلة اوى عسولة خالص رغم انى عمرى ما زرتها والاقى فيها لينكات وتعليقات من ناس ما اعرفهمش خالص وابص الاقى الجروب ده اصحاب وانا معرفهمش وهما ما يعروفنيش لكن اظن انا بقى ليا جروب تدوينى سعيد وفخور انهم اصدقائى وانا انهاردة فكرت انى اكتب عنهم اكتب كل اسبوع بوست صغنون عن مدونة وتبقى فقرة ثابتة بعنوان مدونة الأسبوع وكمان انا هحط فى السايد بار بتاعى أهم أفراد الشلة الصباغية اللى بحب ازورهم دايما وهما كمان بيجو عندى دايما ومخلصين الشاى والأكل أول باول وهما عارفين نفسهم واحد واحد
اصدقائى الاعزاء ان التدوين خلق مساحة جديدة وواسعة للحرية الفكرية وهو أعجوبة هذا العصر ونقطة تلاقى وصداقة لكافة الشعوب والمستويات الفكرية والشعبية تفتكروا بعد عشر سنين هيكون التدوين وصل لفييين ؟؟

أجمل أقــــوال المدونين
يتبقى بقى انى اقول.. انى كنت بجمع أطرف أقوال المدونين اللى كانت بتعجبنى وتستوقفنى وهديكو منها جزء فى الوريد كلمة عبقرية هي من حرفين ... ولكنها أبلغ من ألف مقال... طظ أشرف حمدى من مدونة كاريكاطظ إلى من رافقنى ويعلم سرى .. يعلم متى بكيت ..ومتى رن الفرح فى قلبى ..سمعنى ألتهج محتضرا ..ورأنى ولم يفرح لموتى ..وسحبنى من وحدتى العميقة لأعيش بينه وبين والورق إليك يا.... قلمى طارق هلال Arabic ID من مدونة بحب الرسم وبحب أرسم أحلامي حتى لو كانت بـ......الرصااااااص هايدى حسين من مدونة إرسم بالرصاص لا تجعل سفالة الاخرين تكشف عن سفالتك نوران الشاملى من مدونة بت خيخة وأى كلام ممكن اكون عاقلة..ممكن اكون مجنونة..لكن الاكيد ان لسة قلبى حى من مدونة شـــــهــــروزة من الممكن أن يكون عمر مدوناتنا أطول من أعمارنا..أكتبوا شيء فى ميزان حسناتكم فربما تكون صدقة جارية شريف عبد الهادى من مدونة فبركــة كون اللغة وعاء الفكر وكوني أنطق بلسان عربي غير مبين ، كوني مصري المولد والتاريخ والجذور، حيث أنطق الذال زاياً،وحيث أنطق الثاء سيناً، حيث ذلك كذلك، فإني أستميحكم عذراً إذا جاء الفكر مشوشا تارة، مشوها تارة، معتوها أحيانا، متعقلا أحياناً. بين بين أحايين أخرى _أنا عقل الفكر محبوس بين الجدارن أسامة يس من مدونة وميض لا يهمني اسمك .. لا يهمني عنوانك .. لا يهمني لونك .. ولابلادك .. يهمني الإنسان أحمد على مدونة يوميات عيل مصرى دايما الدنيا فى الأحلام بتبقى أحلى عشان كدة أنا هنا وكأنى فى حلم يعنى هنا هحلم على راحتى أمـــــــيرة من مدونة سهر الليالى هو أنا مش أديب ولا حتي كاتب وأكيد طبعا مش شاعر....... انا أصلا ما بعرفش أكتب من الأساس بس انا بحاول اقول حاجة في قلبي وخلاص كريم محمد من مدونة الأصيل ياخوفى لكون برغوتة نايمة على فروة كلب و بتحلم انها انسان أحمد عاشور من مدونة عاشوريات انا شااااب خجووول جدا من ناحيه البنات وبخاف وبترعب منهم علشان هم دماغهم لاسعه احيانا وبخااااف علي كرامتي جدا وعلي اصحابي جداا جداا وغيور علي اي حد علي اختي وعلي امي وعلي ابويا وعلي اصحابي وعلي حتي زمايلي ليه ماعرفش مصطفى محمود من مدونة حواديت وحكاوى دكتور لأني طبيب ان شاء اللهوحر لأني أعشق الحريه وأحبها وأكره القيد والظلم والحبس والذل وكل ما ما يجعل نفسي وروحي أسيرة لغير الله محمد أبو زيد مدونة دكتور حر

!! اللهم دسترّ مدوناتنـــــــا

أحمد الصباغ

مدونة متضامنه مع الصحافة

تضامناً مع حرية الرأي وضد حبس الصحفيين

إحتجاب المدونة لمدة اربعة وعشرين

من اليوم الأحد 7 أكتوبر وحتى الإثنين 8 أكتوبر