خالد الاسلامبولى اللى اغتال السادات يوم 6 اكتوبر سنة 1981قريت وسمعت وشوفت فى وسائل الاعلام الايام اللى فاتت إن ايران عملت فيلم اسمه اعدام فرعون
وفرعون ده اللى يقصدوه هو انور السادات ، والفيلم بيصور القتلة على انهم شهداء، ، ومعروف ان ايران اصلا كان بتعتبر الاسلامبولى قام بعمل عظيم وسمو احد شوارع طهران الكبيرة بأسم ..خالد الاسلامبولى
انا مش بكتب ده عشان اعلق عن موقف ايران من الرئيس السادات لانى معرفش كل جوانب الموضوع
انا بس كتبت ده لان حسيت ان موضوع الفيلم ده خد اكبر من حقة فى وسائل الاعلام المصرية رغم انه معروف ان ده مش انتاج حكومى وانما انتاج خاص ، ولا يعبر عن سياسة الحكومة الايرانية اللى انا شايف الى حد كبير انها سياسة معتدلة طبعا الا فى تجاة امريكا .. ومعروف ليه
الامر التانى ان واضح اوى ان امريكا فعلا اخدت قرار بضرب ايران .. انا مش بقول خبر سمعتة .. لكن بقول احساس حاسة اوى ... واعتقد ان عام 2008 مش هيعدى الا والحرب بين ايران وامريكا هتكون بدأت
السؤال بقى
هل لو حدثت حرب بين امريكا وايران هذا العام او بمعنى ادق لو شنت امريكا الحرب على ايران
فهل ستكون مصر طرف فى الحرب دى
مش عارف ليه حاسس ان الوضع مختلف تماما عن حالة الحرب على العراق
أولا : وضع ايران القوية ذات الاسلحة النووية واسلحة الدمار الشامل والصواريخ عابرة القارات يختلف تماما عن وضع العراق اللى طلع مافيهاش أى سلاح ولا حتة مَـلـّة سرير
ثانيا : علاقتنا بإيران صحيح متوترة لكن متوترة بفعل السياسة الامريكية لكن مفيش موقف عدائى مباشر زى موقف العراق لما غزت الكويت ، حاسس ان الحكومة المصرية تسير بوضوح فى اتجاة مقاطعة طهران كتمهيد لتأييد الحرب على ايران
ثالثا : دول الخليج مقتنعة بخطورة ايران زى ما هى كانت مقتنعة بخطورة العراق ابان الحرب عليها ، وايران هددت كذا مرة انه فى حالة حدوث اى حرب عليها انها هتناول اسرائيل بصواريخ نووية وعابرات القارات
الحقيقة انا بتمنى ما يحصلش حرب فى المنطقة دلوقت خالص لان الناحية الاقتصادية للمصريين مش ناقصة وانتو عارفين تأثير الحرب دى على الاقتصاد وسوق العمل والاستثمار شكلها ايه
وكمان بتمنى ان الحرب لو حصلت يبقى ايران تطلع راجل وما تطلعش بؤ وخلاص حاكم انا لما بفتكر سعيد الصحاف وزير الاعلام العراقى بتجيلى كرشة نفس
أحمد الصباغ
No comments:
Post a Comment