دول تاجين إتزقو عليا
التاج الأول من العزيزة جدا لمــــــاضة هانم سبع الليل ، والغالية جدا مروة هانم مدحت البندقدارى الشهيرة بقباحــة ..ده اسم الشهرة بس انما هى فى الواقع لسانها ... طويل جدا هههههههه
السؤال الأول : خمسة أحلام كنت بحلمهم في الماضي
------------------------------------------------------
بحلم بيوم .. أشوف الشفايف بتتكلم كلام فيه حب
أحلم بيوم .. أشوف الناس ما عرفوش الجراح ف القلب
بحلم بيوم .. أشوف الدروب ما فيهاش دموع أحزان
أحلم بيوم .. أشوف بكرة بيزرع ضحكة للإنسان
أحلم بيوم تشوف عينيا فرحة قلوب الصابرين
وأشوف الحيارى في طريق الامل ماشيين
وأشوف اللي هاجر راجع هنا لمكانه
وأشوف اللي يائس .. جفت دموع أحزانه
ينفع ده ؟؟؟
السؤال التاني : خمسة أحلام بحلمهم للمستقبل
-----------------------------------------------
هو حلم واحد بس اعتقد انه كفاية اوى .. ان مصر تبقى احسن دولة فى العالم وتتخلص من كل الحرامية والنصابين .. والفلوس المنهوبة ترجع .. والموارد المهدرة ترجع .. والشباب يشتغل بكل طاقتة ويبدع .. كفاية الحلم ده ولا ايه ؟؟
السؤال التالت : شخصين موجودين بحياتى و مبسوطة انهم موجودين فيها؟
---------------------------------------------------------------------------
صديقا عمرى وكفاحى وعمرى : وائـــل وحســــــام
السؤال الرابع : شخصين موجودين في حياتك وكنت تتمنى وجودهم
--------------------------------------------------------------------
هذا السؤال يصعب على أمثالى فهمة فمش هجاوبة
السؤال الخامس : شخصين مش موجودين وتتمنى وجودهم في حياتك
-----------------------------------------------------------------------
الشخصية الأولى : الدكتور أحمد مستجير الذى توفى فى 16/8/2006 وهو العالم الموسوعى وأستاذ الوراثة والهندسة الوراثية والشاعر والكاتب وعضو إتحاد الكتاب وعضو مجمع اللغة العربية، وأستاذى فى كلية الزراعة جامعة القاهرة وكان فى حياتى أشبة بالمنارة التى تضئ للمسافر ليلة ووفاتة كان بالنسبة لى إحدى الصدمات الكبرى فى حياتى وكم أتمنى لو كان موجودا فى حياتى الآن
وهذة صورة لآخر كتاب له أهدانى إياه
وهذا شرح مبسط بخط يدة لبعض أساسيات موسيقى الشعر العربى
الشخصية الثانية : هو المهندس عثمان عزام ، وهو مديرى فى عملى السابق لعدة سنوات وهو ليس مجرد شخصية فى حياتى بل معلم كبير تعلمت فى مدرستة أشياء كثيرة جدا .. وقد توفى فى اواخر العام الماضى وترك فراغا كبيرا فى حياة كل من عرفة .. فتقدير وتحية ودعاء بالرحمة له
تاج الشباب
مررة لى الصديق العزيز النجم القادم
مانظرتك للبنات ذات الملابس المخالفة للإسلام؟
هو الحقيقة انا مش بحاول اقيم الناس ، لإن كل انسان فيه عيوب وربما الانسانة دى يجى يوم وتلبس كويس وتكون اخلاقها وسلوكياتها احسن منى ومكانتها عند ربنا افضل منى ، فبترك موضوع الملابس ده بينها وبين ربها ، ده لا يمنع انى بحترم جدا البنت الملتزمة المحجبة
هل تحكم على اي بنت بمجرد النظر الي لبسها ؟ وماهو معنى الاحتشام عندك ؟
اعتقد اجابة السؤال الاول مناسبة ايضا لهذا السؤال واعتقد ان الاحتشام هو الاحتشام سلوكا فى المقام الاول
هل لحشمة الملابس دور في احترام الفتاة ام انها قناع زائف لدى بعض البنات؟
بصراحة السؤال ده غريب جدا ومجاوب على نفسة ، ومن نوعية الاسئلة اللى بيسألها الاستاذة للتلاميذ فى الحضانة ..ياترى الكداب كويس ولا وحش وهيدخل النار .. هيدخل النار يا استاذ هههه
مامدى تاثير اصدقائك على طباعك وشخصيتك؟
بتعلم منهم بالذات فى طريقة التفكير وبسترشد بوجهات نظرهم بالذات فى الموضوعات اللى مش مكون فيها رأيى قوى
أترى ان الغزو الفكرى أحد الاسباب التى ادت الى هذا الوضع؟
أنهى وضع ، يبدو ان السؤال يعود على الحشمة والله هو فى نماذج مختلفة كتير منها المحجبة الغير ملتزمة بحجابها ومنها المحجبة المحترمة الملتزمة بحجابها ومنها الغير محجبة اللى اخلاقها سيئة ومنها الغير محجبة المحترمة اللى سلوكياتها كويسة
هل تدخل اسرتك في انتقاء ملابسك يضايقك ويقلل من شأنك ويسلبك حريتك الشخصية؟
والله ده ما حصلش قبل كدة ، بس ممكن يبقى فى ملاحظة زى البنطلون ده ضيق شوية كدة يعنى
ومش همرر التاجين دول لحد
اللى عايز ياخدهم ياخدهم ، ويسيب نص جنيه على باب المدونة
تقبلوا تحياتى وتقديرى
No comments:
Post a Comment