!!كلام العيال البلوووجرية

أصدقائى وأحبابى الاعزاء

انا بدأت التدوين فى مارس 2007

ومنذ هذا التاريخ انضميت لعالم المدونين الكبير

والحقيقة ان المجتمع البلوجرى قد أطلق لأول مرة عام 1999

الا انه لم يتخذ شكلة الحالى الا عام 2003

ثم شهد عام 2006 الصورة الحالية للتدوين

وبدأت ثورة كبرى .. هى الثورة التدوينية

واذا كان هناك عصر القنبلة الذرية وعصر السماوات المفتوحة

فأنا شخصيا أسمى هذا العصر .. عصر التدوين

و يوم بعد يوم

بدأت تتضح ملامح المجتمع التدوينى

وتتراص أفراد الأسرة التدوينية

وبدأ هذا المجتمع فى الترابط والتماسك والتواصل

بقينا نهنى بعض فى اعياد الميلاد

وفى الأفراح والمناسبات

ونعزى بعض فى حالات الوفاه

بدأنا نفهم بعض

ونتعرف على بعض اكتر

بجد يا جماعة المجتمع التدوينى ده صار مجتمع عظيم

لا يقل ابدا عن مجتمعات اخرى زى الصحافة والاعلام او الجامعات

اصبحنا أبنا ء كار واحد

اتضحت ملامحنا لبعض

تعارفنا على أفراد الأسرة التدوينية

عرفنا ان فلان عصبى وبراوى

وشايف النص الفاضى من الكوباية

وساخط على الاحوال السيئة الموجودة فى بلادنا العربية

وعلان هادى ومتكيف ومبسوط اوى وحاطط ايده فى ميه باردة وشايف النص المليان من الكوباية

وتبتان متدين وهمة الشاغل هى القضايا اللى بتمس دينة

وفلانة بيتوتية اوى ورومانسية وبتحب كل الناس وبتكتب من قلبها

وعلانة وطنية ومتحمسة للبلد

وهكذا

وانا شخصيا بدأت اعرف مجموعة كبيرة من الاصدقاء المدونين

اللى كلهم ..فعلا.. ينطبق عليهم قول

رب أخ لك لم تلده أمك

ولقيت فيهم وفى كتابتهم وتعليقاتهم

وجبات روحية يومية

!تشبع الروح الصحفية الكامنة فى معاميقى

و تملى الحياه الرتيبة الكئيبة الجافة

لقيت فيهم المرح والجدية والحماس والسخط والعمق والطفولة والحب والاخلاق النبيلة

واظن كلنا حسينا بنفس الشعور

أظن فعلا احنا بقينا أبناء كار واحد

زى النجارين والصحافين والمهندسين والدكاترة

لما تقول لدكتور .. تعرف الدكتور فلان ؟

يقولك آه مش اللى فاتح على أول الشارع اللى جنبنا

ده باطنى شاطر وكشفة بكذا وعنده ولد فى كلية كذا واخوة اسمة كذا وأمة أصلا كانت داية

وبيعمل عمليات فى مستشفى كذا

اهو انا بقيت كدة

لما تسألنى عن مدون

أقولك اه ده صاحب مدونة كذا وفى كلية كذا وغاوى ندوات او بيحب الرسم أو الشعر و كان عامل معرض فى الحتة الفولانية عشان حكالنا مرة عن المعرض ده

ويوم بعد يوم

المجتمع التدوينى بيكبر

وبنرتبط ببعض اكتر وبنفهم بعض اكتر

صحيح فى تكتلات تدوينية

لان تقريبا فى حوالى 20000 مدونة مصرية

واكيد مفيش حد قدر يزور ويحصر كل المدونات

فحصلت بعض تكتلات

ساعات ادخل مدونة جديدة الاقيها جميلة اوى عسولة خالص رغم انى عمرى ما زرتها

والاقى فيها لينكات وتعليقات من ناس ما اعرفهمش خالص

وابص الاقى الجروب ده اصحاب وانا معرفهمش وهما ما يعروفنيش

لكن اظن انا بقى ليا جروب تدوينى

سعيد وفخور انهم اصدقائى

وانا انهاردة فكرت انى اكتب عنهم

اكتب كل اسبوع بوست صغنون عن مدونة

وتبقى فقرة ثابتة بعنوان مدونة الأسبوع

وكمان انا هحط فى السايد بار بتاعى أهم أفراد الشلة الصباغية

اللى بحب ازورهم دايما وهما كمان بيجو عندى دايما

ومخلصين الشاى والأكل أول باول

وهما عارفين نفسهم واحد واحد

اصدقائى الاعزاء

ان التدوين خلق مساحة جديدة وواسعة للحرية الفكرية

وهو أعجوبة هذا العصر

ونقطة تلاقى وصداقة لكافة الشعوب والمستويات الفكرية والشعبية

تفتكروا بعد عشر سنين

هيكون التدوين وصل لفييين ؟؟

أجمل أقــــوال المدونين

يتبقى بقى انى اقول.. انى كنت بجمع أطرف أقوال المدونين اللى كانت بتعجبنى وتستوقفنى
وهديكو منها جزء فى الوريد

كلمة عبقرية هي من حرفين ... ولكنها أبلغ من ألف مقال... طظ
أشرف حمدى
من مدونة كاريكاطظ


إلى من رافقنى ويعلم سرى .. يعلم متى بكيت ..ومتى رن الفرح فى قلبى ..سمعنى ألتهج محتضرا ..ورأنى ولم يفرح لموتى ..وسحبنى من وحدتى العميقة لأعيش بينه وبين والورق إليك يا.... قلمى
طارق هلال
Arabic ID من مدونة


بحب الرسم وبحب أرسم أحلامي حتى لو كانت بـ......الرصااااااص
هايدى حسين
من مدونة إرسم بالرصاص


لا تجعل سفالة الاخرين تكشف عن سفالتك
نوران الشاملى
من مدونة بت خيخة وأى كلام


ممكن اكون عاقلة..ممكن اكون مجنونة..لكن الاكيد ان لسة قلبى حى
من مدونة شـــــهــــروزة


من الممكن أن يكون عمر مدوناتنا أطول من أعمارنا..أكتبوا شيء فى ميزان حسناتكم فربما تكون صدقة جارية
شريف عبد الهادى
من مدونة فبركــة


كون اللغة وعاء الفكر وكوني أنطق بلسان عربي غير مبين ، كوني مصري المولد والتاريخ والجذور، حيث أنطق الذال زاياً،وحيث أنطق الثاء سيناً، حيث ذلك كذلك، فإني أستميحكم عذراً إذا جاء الفكر مشوشا تارة، مشوها تارة، معتوها أحيانا، متعقلا أحياناً. بين بين أحايين أخرى _أنا عقل الفكر محبوس بين الجدارن
أسامة يس
من مدونة وميض


لا يهمني اسمك .. لا يهمني عنوانك .. لا يهمني لونك .. ولابلادك .. يهمني الإنسان
أحمد على
مدونة يوميات عيل مصرى


دايما الدنيا فى الأحلام بتبقى أحلى عشان كدة أنا هنا وكأنى فى حلم يعنى هنا هحلم على راحتى
أمـــــــيرة
من مدونة سهر الليالى


هو أنا مش أديب ولا حتي كاتب وأكيد طبعا مش شاعر....... انا أصلا ما بعرفش أكتب من الأساس بس انا بحاول اقول حاجة في قلبي وخلاص
كريم محمد
من مدونة الأصيل


ياخوفى لكون برغوتة نايمة على فروة كلب و بتحلم انها انسان
أحمد عاشور
من مدونة عاشوريات


انا شااااب خجووول جدا من ناحيه البنات وبخاف وبترعب منهم علشان هم دماغهم لاسعه احيانا وبخااااف علي كرامتي جدا وعلي اصحابي جداا جداا وغيور علي اي حد علي اختي وعلي امي وعلي ابويا وعلي اصحابي وعلي حتي زمايلي ليه ماعرفش
مصطفى محمود
من مدونة حواديت وحكاوى


دكتور لأني طبيب ان شاء اللهوحر لأني أعشق الحريه وأحبها وأكره القيد والظلم والحبس والذل وكل ما ما يجعل نفسي وروحي أسيرة لغير الله
محمد أبو زيد
مدونة دكتور حر

أغــرب المدونات

من المدونات اللى مريت عليها اللى ليها أفكار غريبة

جمال واحد وخمسين
ولعل مدونة جمال 51 من المدونات الغريبة التى مررت عليها
وجمال طه هو رجل مصرى عاش فى السعودية 13 سنة ويبدو انه ثمة مشكلة حدثت بينه وبين احد المواطنين السعودين تسببت فى فقدة لعملة أو اموالة فأنشأ هذة المدونة وخصصها لتوجيه الويل والوعيد لملوك السعودية السابق والحالى

أنا حرامى
تم إنشاءها لمواجهة مؤتمر أنا..بوليس
وقال صاحبها : لاني ضدهم مدام ... هما أنا بوليس يبقي أنا
حرامى

من أجمل التصميمات

ومن تصميمات المدونات اللى عجبتنى
قهوة زيارة
البيرونى



مسمياتى فى المدونات

الشائع عندما يود أحد الاصدقاء الاشارة الى مدونتى فإنه يستخدم اسم خالو أحمد .. أو أحمد الصباغ ..الــخ
ومن أطرف التسميات اللى أطلقها مدونين على مدونتى

أحمد الصباغ الشهير بخالو بس خالو هوه مش خالى انا ...مدونة مخطوبة

!!!الخال ....مدونة بلا اسم

الصباغ...أو كذا يبدو ....مدونة يوسفيات

وأخيرا وقبل ما أختم البوست والناس تبدأ تحدف البيض والأوطة

أحب أهنئ الدكتور أيمن نور فى سجنة بيوم ميلادة

5 ديسمـبر

وكلنا منتظرين اليوم اللى نحتفل بميلادة وهو فى وسطنا

ولكل ظلم نهاية

وانتظروا المزيد من كلام العيال البلوجرية قريبا

أحمد الصباغ