أصدقائى وأحبابى 
العيد الخالو أحمدى
أما العيد بالنسبة لى فيعنى المخاليل وكتاكيت العيلة
ويعنى الكشرى ومسدسات الميه
(اللى بتغرقنى طبعا مش اللى بلعب بيها)
ويعنى لى جنينة الحيوانات والفسطاط والقلعة
ومسرحيات رية وسكينة
وشاهد ماشفش حاجة وعش المجانين
ويعنى زيارة الجدة والأعمام
والخيلان والاقارب
فى ذكرى تاريخية لا تتكرر كثيرا طوال العام
العيد فرصة جميلة للتقارب والمحبة والصفاء
العيد معنى أكثر من مجرد لحمة وأنتخة
العيد فرصة لقطة لصلة الرحم وود الاصدقاء
العــــيدية
بالنسبة لفئة معينة من البشر
ومنهم المخاليل طبعا
:) وبعض الاصدقاء المدونين
اللى جم هنا طمعا فى العيدية
فإن العيد يعنى لهم بالطبع عيدية
وبما إنى خالو فنجرى واللى فى جيبى مش ليا
فإليكم العيديات الكبرى
للمخـــــاليل
للمدونين أقل من سنتين
للمدونين أقل من سنتين وشهرين 
للمدونين أقل من سنتين وشهرين ونص
أنا سامع واحد بيقول
إيه الخالو البخيل ده ؟
شايفك ياللى بتتكلم
لسه بقى عيديات المدونين الكبار
فوق التلات سنين وحتى مائة عام
والعيدية دى بقى لأصدقائى حول العالم
المخــــاليل فى العيد
ويمثل العيد الكبير ثانى أكبر تجمع مخاليلى
حيث تؤتى بالمسدسات والعرايس والكور والبلالين
ويتجمع فى بيتنا كل مخلول ومخلولة من كل فج عميق
وأبدو كما لو كنت قاعد فى مورستان
ويبدأ مهرجان العض والصويت والزيطة
ولا يسلم الأمر من بعض الحوادث
دلق شاى
أو شنكلة وبطحة فى النافوخ يعقبها عاااااا
المهم ينقضى العيد
وأشعر بان دماغى فى حجم كوكب المريخ
ولكن يبقى العيد ذكرى من أجمل ذكريات العمر
وذكــرى مؤلمة
وبما أن لحظات الفرح لابد ان يتخللها لحظات أليمة فسنظل نتذكر اللحظات المؤسفة العيد الكبير الماضى
عندما طالعتنا الفضائيات صبيحة أول ايام العيد
بإعدام صدام حسين
وبغض النظر عن أى اعتبارات سياسية
فقد تألمت كثير جموع الشعب العربى والمسلم
يااااارب
أعد علينا وعلى أمتنا الاسلامية والعربية
عيد الاضحى المبارك
بالخير والاتحاد والقوة والرجوع الى الرشد
يااااارب
إن غيرنا من الأمم قد نبذ الشقاق وتطلع إلى المستقبل
فى ظل الاتحاد والاعداد للسبق والتفوق
وأمتنا قد صارت فى سابع نومة
اللهم أوقظ أمتنا إلى فجر التقدم
والتفوق واليد العليا
ياااارب
اجعل العيد مباركا على أهلنا واصدقائنا
وأمهاتنا وأخواننا
وكل المسلمين فى كل مكان فى العالم
وكل عام وحضراتكم بخير
أحمد الصباغ
No comments:
Post a Comment