أحمد الصباغ: مصيبة الدويقة لسه ما خلصتش يا مصر

عديت انهاردة من عند الدويقة وكانت النية ادخل عزبة بخيت لكن الكردون الامنى وريحة الموت وعربيات الاسعاف والناس اللى لابسة اسود فى كل حتة خلتنى تراجعت . صليت فى جامع قريب . الشيخ كان بيدعى للمنكوبين فى الحادثة

حتى اليوم الثلاثاء 51 قتيل وحوالى 70مصاب والجهود معظمها أهلية ما عدا عربيات الاسعاف اللى بتنقل القتلى والمصابين للمشرحة او المستشفى والاهالى بيقولو ان ظباط الشرطة قاعدين قدام القهاوى وصدامات بين الاهالى والامن
المصرى اليوم - بيقول انهم طلعوا عشر أحياء انهاردة لكن بيتكلمو عن فرق انقاذ واصلا كل الصور بتقول ان الاهالى هما اللى شغالين فى الانقاذ . . ومحافظ القاهرة بالصلا على النبى شغال تصريحات على ودنة
والموضوع شبه نام والصدى الاعلامى بتاعة بيقل رغم انها كارثة كبرى
فى بعض الناجين اسرهم بالكامل ماتت او لسه تحت الانقاض
وحالة رعب سايدة المنطقة من انهيارات صخرية تانية وامبارح بالليل وقعت شوية صخور تانى
وبقى أهل الدويقة حالهم شبه حال الباعة المتجولين فى ميدان الجيزة لما بيسمعوا كلمة بلدية بيتجننوا لما يسمعوا كلمة صخور او الجبل بيقع بياخدو ولادهم وطيران والله حراااام يا جماعة انا بعيط حالتى النفسية سيئة جدا
والحكومة فرضت كردون أمنى حول المنطقة والمفتى أفتى بفتواه ان ضحايا الدويقة شهداء
وانهاردة تم العثور علي أحشاء آدمية وقدم يسري لامرأة

وفى راجل اسمه أبو وحيد مراتة وولادة واحفادة ماتو كلهم فى الحادثة 13 واحد والغريب ان الحكومة والصحافة وكل الناس بيتعاملو مع الموضوع على انه حادث عادى وعدى والدنيا هديت ونامت ولسه أصلا الناس تحت الانقاض

القذافى عايز يبنى مدينة سكنية لضحايا الدويقة .. آى والله .. واتبرع بخمسة مليون جنية لمساعدة منكوبى الدويقة .. واتصل بمسئولى الحكومة المصرية للبدء فى بناء المدينة .. ده مش كلامى الخير هنا فى المحيط