فاكر ورق رمضان المعمول بالنشا ؟ واللمبات القلاوظ أُم طبق بلاستيك ؟ والفانوس الكبير المعمول من الخشب والجلاد الملون ؟
ناوى تصوم زى كل سنة؟ ولا ناوى يكون صيامك أحسن السنة دى؟ ولا ناوى يكون صيامك جوع وبس؟ بتصوم وتفطر على تمر ولبن؟ ولا على تمر بس؟ ولا على ميه ساقعة؟ ولا بتفطر عالفوازير؟ بتحب بوجى وطمطم؟ بتحب تسمع مين من مقرأى القرآن؟ بتحب "مولاى إنى ببابك قد بسطتُ يدى"؟ وبتسمع "يارب عدتُ إلى رحابك تائباً"؟ بتاكل كنافة ولا بتوجع لك بطنك؟ بتنام بعد الفطار شوية؟ ولا بتتفرج على التليفزيون لغاية التراويح؟ بتفتح التليفزيون أساساً فى رمضان ولا بتقاطعه؟
فاكر الفانوس أبو شمعة؟ والفانوس أبو لمبة؟ والفانوس أبو مزيكا؟ بتحب أنهى أكتر ؟ إشتريت فانوس السنة دى لأطفال العائلة ؟
فاكر المسحراتى سيد مكاوى "مسحراتى منقراتى فى البلد جوال"؟ بكار أحلى ولا بوجى وطمطم؟ بتتسحر؟ ولا ما بتفرقش معاك؟ بتنام بدرى وتصحى قبل الفجر تاكل؟ ولا بتسهر لغاية السحور وبعدين تنام؟ وناوى تعمل إيه السنة دى؟ بتاكل كنافة وقطايف ولا كنافة بس؟ بتحب الياميش؟ بتنزل السيدة والحسين والازهر فى رمضان؟ إتسحرت عند الجحش قبل كدة؟ رحت الحديقة الثقافية فى السيدة زينب قبل كدة فى رمضان؟ عمرك صليت التراويح فى عمرو بن العاص؟ طب صليتها فى الحسين؟ طب فى السيدة زينب؟ بتصليها فى الجامع اللى جنب البيت؟
طب فاكر بوجى وطمطم فى رمضان ، وبوجى وطمطم والفيل الجميل ، ومحطة فلافيلو، وبوجى وطمطم والفانوس السحرى ، وحبيبتى إسمها مصر ، وأولاد القمر ، وفاكر أخر مواسم بوجى وطمطم عن النيل فى رشيد ؟
طب فاكر "رمضان جانا" و" أهو جه يا ولاد" و"إفرحوا يا بنات" و"هاتوا الفوانيس يا ولاد" و "وحوى يا وحوى" و"مرحب شهر الصوم" و "سبحة رمضان لولى ومرجان" و"يابركة رمضان" و "والله لسه بدرى والله يا شهر الصيام" ؟
هتدخل الفيسبوك فى رمضان؟ طب هتفتح المدونة؟ بعت لصحابك رسايل تهنئة فى الموبايل ولا على الميل بس؟ ولا إتصلت بيهم؟ بتتعب من الجوع؟ ولا من عدم شرب الشاى؟ ولا من قلة التدخين؟ طب فكرت تبطل التدخين فى رمضان؟ نجحت؟ ولا فشلت فى وقف التدخين؟ فطرت فى مائدة رحمن قبل كدة؟ جربت تعيش الاحساس ده ولا بتعتبرها مظهر من مظاهر الفقر؟ بتروح خيم رمضانية فى رمضان؟ بتعلق ورق وزينة قدام بيتكم؟ ولا سايب المهمة دى على عيال الشارع؟
بتسمع راديو فى رمضان؟ بتسمع تواشيح؟ بتختم القرآن؟ ولا بتختم كام مسلسل؟ بتابع كورة فى رمضان؟ بتابع الناس فى الشارع من الشباك وهى بتحتفل برمضان؟ ولا بتنزل تحتفل معاهم؟ إتسحرت على عربية فول قبل كدة ؟
صليت التراويح قبل كدة فى المسجد الأقمر وعمرو بن العاص والحسين والإزهر والسيدة زينب والسيدة عائشة والسلطان حسن والرفاعى ؟ بتفكر تجرب السنة دى ؟
لو جاوبت على الأسئلة دى يبقى إنت جاهز عشان تعيش رمضان بكل معانيه
فكر وقوللنا ناوى تعيش رمضان إزاى السنة دى ؟
***
جروب شهر رمضان الكريم (و) مدونة أحمد الصباغ .. يهنئانكم بقدوم شهر رمضان المعظم .. وكل سنة وإنتم طيبين
أحمد الصباغ
No comments:
Post a Comment