سعر قرش الحشيش اليوم في القاهره

أنا إتشبهت يا ولاااد
بعد انتهاء الاجازة والرجوع للعمل أفتح المدونة

ببص على الترافيك جام
اللى هو العداد اللى بيعرفك الناس دخلوا المدونة منين
لقيت واحد كان عامل سيرش فى جوجل عن
"سعر قرش الحشيش اليوم في القاهره"
اااااااااخخخخخخخ
وجوجل جابة عندى بالصلاه عالنبى
ده على أساس انى مرجع هام فى الحشيش ولا ايه ؟؟
خالو احمد موسوعة مخدرات ياناس
بصيت لقيت جوجل كان جايبة على البوست اللى كنت كاتبة
عن جروب فيسبوكى اسمه رابطة محبى الحشيش فى مصر

اللى ضحكنى مش انى اتشبهت لانى عمرى ما جربت الصنف
لكن اللى موتنى من الضحك ان فى واحد داخل يبحث عن
سعر قرش الحشيش انهاردة فى القاهرة كام ؟؟
يعنى هما قالو ان اكتر شعب بيبحث فى جوجل على كلمة سكس
هو الشعب المصرى
لكن بالطريقة هناخد مركز أول كمان فى الحشيش والمخدرات
ومش بعيد نلاقى سيرش عن
" كيف تتحرش بفتاه فى ميدان التحرير ليلة العيد"
طبعا لو انت من اللى بتهتم بتتبع جروبات الفيس بوك
على سبيل رصد ظواهر المجتمع ومعرفة الشباب بيفكر ازاى
هتعرف ان فى جروبات كتير محورها الحشيش
للدرجة دى الحشيش انتشر فى بلاد المحروسة؟؟
والناس بتدور على أخبارة واسعارة فى كل مكان حتى النت ؟؟

يعنى مش بعيد بكرة نشترى الجرنان
نلاقى جدول اسعار العملات
وجدول اسعار الدهب
وجدول اسعار الحشيش فى المحافظات

ونلاقى فى نشرة الاخبار بعد النشرة الجوية كدة المذيع بيقول
هذا ونوافيكم بإسعار الحشيش فى محافظات الجمهورية
القاهرة .. حشيش نقى صنف ممتاز .. الجرام 40 جنية
الاسكندرية .. حشيش محوج .. الجرام 35 جنية
شرم الشيخ .. حشيش سيناوى معتبر .. الجرام 50 جنية
كما تحذر وزارة الداخلية تجار الحشيش الجشعين
من تداول الحشيش فى السوق السودا والغش التجارى
وان التعامل يتم فقط مع المراكز المعتمدة لتداول الحشيش
هذا وقد صرح وزير المزاج العالى بأن الحشيش متوفر وبسعر التداول
والحكومة تؤكد حرصها الدائم على وصول الدعم لمستحقيه


بنت أختى الصغيرة
مخلولة لمضة عندها بتاع سبع سنين كدة بتقولى
وانت ايه اللى خلاك تكتب عن المخضروات يا خالو ؟؟؟