الانينيموس فى حياة كل مدون شئ اساسى بيدخل مع كل بوست يدلو بدلوه فى الموضوع سواء بشتيمة مباشرة أو اهانة أو استعباط أو استظراف او اى قرف ، وبقى الموضوع عادى بالنسبة لكل مدون
واصبح لكل مدون الانينيموس الخاص به ، شايلة فى ميدالية المفاتيح ، وبيقعد يفرج أصحابة عليه ، ويقولهم شوفوا الانينيموس بتاعى حلو أزاى ، ويقولوا له : وااااااااو نايس انينيموس أنت جبته منين ده
وبعض المدونين بقى ليهم قرين .. وهى درجة انينيموسيه أعلى
راجع قرين قطة الصحراء ، وآبى بلانت .....الخ
كمان فى درجة أعلى من الانينيموس القرين ، وهى درجة الانينيموس النصاب وهو شخص بيعمل مدونة تانية وبنفس توقيعك كمان
راجع موضوع مصطفى الحسينى صاحب البوابة
عن قرينة النصاب
يعنى المدون المبتدئ بيبقى له انينيموس عادى ، وبعدين ربنا بيوفقة ويترقى ويبقى له قرين
وبعدين اذا اجتهد وبقى يشرب اللبن وماما بتدعيلة
يقوم يطلع له انينيموس نصاب
أنواع الانينيموس
الانينيموس الكئيب : وهو انينيموس بيشمشم على أى مدونة ضاحكة او بوست ساخر او تهنئة أو عيد ميلاد أو مناسبة سعيدة أو حتى صورة ورد ويدخل يبكت فى المدون وينصحة بإنه يتكسف على عينه ويكشكشها ما يعرضهاش وان الايام السودا لسه جاية فمتفرحش اوى
الانينيموس الشــبـّيـح : بتشديد الباء وهو انينيموس داخل جوجل يعمل سيرش عن سعر الحشيش او عن حتة فيلم سكس وبعدين يكون فى مدون كاتب كلمة حشيش او جنس فى مدونتة فيدخل عم الشبيح يلاقى قصيدة شعر أو موضوع سياسى فيدخل يدلو بدلوه فى الموضوع .. وشوووف انت بقى اكيد لما الشبيح يكتب .. هيكتب درر
الانينيموس الحقنة : وهو انينيموس يهدف فى المقام الأول الى توقيع الناس فى بعضيها والقيام بدور مهدئ النفوس .. وزرع الكراهية والعداء فى كل مدونة يزرع فيها تعليقة
مثلا : يدخل عند فولان يقول انت سارق الموضوع ده من علان .. او يقول لفولان انت ما بتفهمش حاجة ده علان كتب عن الموضوع ده احسن منك ، وبعتبر الانينيموس القرين من النوع الحقنة
الانينيموس الإعلانجى : وهو انينيموس غالبا كان طموحة انه يطلع صبى اعلانجى ، يدخل فى كل مدونة ويلزق إعلان عن موضوع غريب لا يمت لموضوعك ولا لإهتمامك ولا سياق مدونتك بصلة .. يعنى مثلا يبقى مدون كاتب عن السينيما او واحدة كاتبة عن الطبيخ وتلاقيه داخل حاطط إعلان عن : دعوة للتضامن مع حيثيات عولمة الأدب الميتافيزيقى للخروج من أزمة المضمون السيريالزمى والغريب انك ممكن تلاقى نفس الاعلان متكرر فى نفس البوست تلات اربع مرات يعنى حتى ما بيبصش هو نسخ الاعلان هنا قبل كدة ولا لأه
الشيخ انينيموس : وهو انينيموس درويش ، يرتدى عمة حمراء كبيرة وجلباب ضخم ويجلس فى حلقة ذكر ماسكا اللاب توب بتاعة ، وما ان يرى كلمة مخالفة لتعاليم الدين حتى تثور ثورتة ويدخل ناهرا المدون ومتوعدا بالويل والثبور وسوء العاقبة ، ورغم انه غالبا بيكون خطابة الدينى ضعيف جدا الا انك لو ما اقتنعتش بكلامة يدخل بكومنت تانى ويبشرك بالنار خبط لزق
خالتى انينيموس : وهو انينيموس - بعيد عنك - بالع كلبة والده .. يدخل يشتمك وبدل ما يشتمك بما قل ودل لأ .. يكتب تقرير مفصل عن كينونة الاباحة المتأصلة فى دمه
وغالبا ما يثرثر بكلام محبط ويائس وينم عن شخصية سيكوباتية
الانينيموس الطفيلى : وهو انينيموس ينتشر ويتوغل وينتشر فى كل الصفحات والتعليقات والايميلات والماسنجرات .. تمسح له تعليق .. يبعت رسالة .. تمسح له رسالة .. يبعت تعليق .. وهكذا
الانينيموس الممل : وهو انينيموس يترك لك تعليقات ليس لها طعم ولا لون .. يعنى ما تبقاش فاهم هو عايز يشتم ولا عايز يتسلف فلوس ولا جاى ليه فى انهاره الاسود ده
الانينيموس التايه : اى والله مرة جالى تعليق من واحد انينيموس بيسأل عن اسم محل فى شارع الازهر .. وكان فى بوست متضمن عمل أدبى
الانينيموس الرومانسى : وهو انينيموس عاطفى ما أن يكتشف إن صاحبة المدونة هى أنسة حلوة تتمنى الاستقرار حتى يدخل عليها بالحنجل والمنجل ويسألها أسئلة بعيد عن الموضوع من نوعية : أنتى مرتبطة ولا لأ؟ أو هى الخواطر دى شخصية ؟ أو هو ليه كل اللى معلق عندك رجالة ؟ أو أنا أول ما شوفت مدونتك قلبى رفرف .. وهكذا
أنينيموس فى الافتتاح
اللى فطسنى من الضحك حكاية واحد جارى عنده بتاع سبعتاشر سنة بقالة سنة بيتابع مدونتى ، وحلم حياتة انه يعمل مدونة .. وف يوم جالى طاير من الفرح انه عمل مدونة .. وقولت له انهاردة لما ارجع البيت ، هدخل وهكون اول واحد يعلق عندك .. شوية ولقيته بيتصل بيا وبيعيط وبيقولى : فى واحد مجهول دخل كتب اول تعليق وشتمنى من غير ما اعمل له حاجة اهئ اهئ.. فمسحت المدونة
علاقة المدون بالانينيموس
وأصبح الان ممكن نسمع عن مدون اخلاقة عالية .. الانينيموس بتاعة بطل يدخل يشتمة لمدة اسبوع قام المدون راح يسأل عن الانينيموس فى البيت ويتطمن عليه ، أو مدون .. الانينيموس بطل يدخل يشتمة قام المدوّن جالة صداع وزغللة وراح يتعالج فى مصحة لمعالجة الإدمان
تبخير المدوَّنات
أقترحت المدونة أم سيد ان كل مدوّن يبخر مدونته لأنها تعتقد ان الانينيموس دول هما - بسم الله الرحمن الرحيم - من أسيادنا وإنه يتثنى على كل مدون تماشيا مع التكنولوجيا .. وضع خرزة زرقة فى المدونة ودق مسامير فى شاشة الكمبيوتر وذلك لفك العكوسات .. الهم إنى بلّغت اللهم خـد أم سيد
إمتحان فى علم الانينيموس
التعبير :أكتب فى أحد الموضوعات الأتية
أكتب قصة قصيرة لا تقل عن ميه واربعين صفحة أسلوب خالتى أنينيموس فى شتيمة المدوّن
أكتب قصة عن رحلة انينيموس رومانسى من أول تعليق وحتى جلوسة أمام المأذون
اجب عن سبعة من الخمس اسئلة الاتية
أولا : اذكر نوع الانينيموس الخاص بك مع التعليل والشرح؟
ثانيا : وضح بمثال الفرق بين الانينيموس الخنيق والانينيموس الغتيت؟
ثالثا : اذكر ثلاثة اشياء للحفاظ على الانينيموس من عوامل التعرية؟
رابعا : علل - الانينيموس يبدأ عملة بعد الثانية بعد منتصف الليل
خامسا : ردد الجملة الاتية تلات مرات : أنينيموسنا ضرب أنينيموسكم قام أنينيموسهم قال لأنينيموسنا خلى بالك من أنينيموساية أنينيموسكم
-------------
ملاحظــة 1 : أنا مش ضد الاعلانات فى التعليقات على طول الخط .. يعنى اما اكون عايز اعمل اعلان عن مناسبة ادبية مثلا يبقى اروح للناس المهتمة بالأدب .. لو عايز اعمل تضامن مع معتقل مثلا يبقى اروح للناس اللى غاويين سياسة
ملاحظـة 2 : لا يتضمن الكلام السابق إشارة إلى أصحابنا اللى ما عندهومش اكونت على جوجل وبيدخلوا انينيموس دول ينوروا فى أى وقت والمدونة مدونتهم
أحمد الصباغ
No comments:
Post a Comment