قهوة ودخــان

قعدتكْ كُـل يوم بالليل على قهوتكْ  

وإنت قاعد تستجــمْ ..

تنفُــخ الدخان بشهوة ف السما

وتشرب القهوة ..

وتبـُص لصورة حبيبتك بالدخان بتترسمْ ..

وذكريات يومك الطويل محصراك ف قمقم حزين

ولا السنين ..

إللى إنت قاعد فيها وحدك

وأوضتك الخنقة العتيقة

وإنت بتناكش حيطانها

والحيطان اللى بتوسوس ودانها

والودان اللى بتصحصح جـِـنانها

كل ما بتسمع مُـــنير

والجِــنان اللى إنت عايش فيه سعيد

والسعـــادة اللى جاية من بعيد

والبعاد اللى حابس نفسك فيه وحيد

والوحدة هانت..

طول ما دخان سيجارك صاحى بين ايديك

طب والسهر ؟

والناموس .. اللى خلى جتتك صارت حجر

والجاموس اللى ف هيئة بشر

ويوم ما تتكلم بيتريق عليك

قمت قولت : إن أسلم حل إنى أسكت ؟

ياميت ندامة عالشباب المستخبى فى كل حارة

لما الزمان يفركك زى ما بتفرك سجارة

خلى بالك ..

القهوة خلصت ..

والدُخـــان لســة بيترســم ْ

أحمد الصبّــاغ