يوميات ثورجى تحت التمرين

الحلقة الأولى

تحياتى ليكم من زلنبوخ البلد .. مين زنلنبوخ البلد دى ؟

المهم انا طبعا واحد مش شباب الطلائع .. هههه حلوة الطلائع دى على الطلائع بالتلاتة ماهم نافعين

قررت انى انضم للعيال الثوار اللى هما بيقعدو يتكلموا فى السياسة ويسيحوا للانظمة الحاكمة فى البلاد العربية.. ويعملوا مدونات ويكتبوا فى السياسة ويمشوا فى مظاهرات ( ابقوا فكرونى عايز اسأل هو ينفع الواحد يركب تاكسى فى مظاهرة ولا لازم يمشى ) ويكتبوا فى جرايد المعارضة والحاجات دى وبعدين لما الواحد منهم يتم رسالتة فى الحياه بنجاح ينام مستريح البال والضمير فى سجن طرة .. قررت ده بقلب جامد حضنت امى واخواتى بحرارة ونظرة الوداع فى عنيا ونظرة اندهاش فى عنيهم .. مالة الواد ابن المجنونة ده .. بيسلم علينا ليه وهو لازق مش بيخرج .. ياجماعة الانسان ياما يعيش عيشة هنية يا اما يموت فى سبيل من يحب .. نظرة الاندهاش تحولت لنظرة استجنان .. ما أنت واكل شارب نايم ناقصك ايه .. مش فهمننى الناس دى ؟.. عايز امهد لموضوع الثوار ده .. ياجماعة الانسان مننا اتولد لهدف لرفض الظلم للوقوف فى وجة المغتصبين والمعتدين والناس الوحشة دى .. معتدين ؟؟ مغتصبين ؟؟ مازالوا يأكلون الجوافة والسميط لاااااااااااااااااااااا صرخت من اعماق حنجرتى ففزع العيال الصغيرة ولاد اخواتى ونعل الكبار سنسفيل جدودى ..اقفل الجعورة يا كلب .. وقفزت من مكانى والحماس يفط فى عروقى وشرارة الثورة بتنط من عنيا الجوز وبدأت اول المهام السرية الثورية الوطنية الشعبية .. هعمل مدونة وانضم لجمعية المدونين الثوار الماركسية .. والجناح العسكرى للتنظيم التدوينى الشعبى.. ومؤتمر التدوين السرى للاطفال ذوى الاحتياجات التدوينية .. ومؤسسة دوننى يامعلم الشيوعية..وحركة الجبهة الشعبية من أجل التدوين .. وجمعية ولاد الدون البيئية الخضراء ..وقمت بمتابعة برنامج ما يطلبة المدونون وأتصلت وقمت بطلب أغنية عملنى التدوين والنبى يا أحمد للمطربة ادوينا المدونى .. وهكذا عملت المدونة وطبعا ما نسيتش اعملها سرية يعنى محدش يقدر يطلع عليها من باب الامان والتخفى عن أعين البوليس ابن الذين ..

أنتظروا الحلقة الثانية قريبا

أحمد الصباغ