الغريب الاخرس لو جه بلدنا
هيتكلم وينطق فيها ويقول
وتتفك عندنا عقدة لسانة
ويمكن يرجع بلادة مشلول
ويمكن من اعجابة بسواد نهرنا
يروح رامى نفسة فيه على طول
وتتعب نفسيتة ده غير المرض
هياكل جتتة ويرعى ويصول
ماللى هيسمعة ويشوفة عندنا
من بنات مهملة وشاب كسول
وناس على بلاج المجارى عايمة
وبلاعة مفتوحة زى بير بترول
ومية غسيل فى السما طايرة
دلقتها عليه الست ام سحلول
وحلوة متشيكة عريانة ما تعرف
ولا لابسة ..اهو زى ما تقول
وشعرها الاصفر الناعم بيغرى
احنا ف فرنسا ولا فى استطنبول
وشاب ماشى والسلسلة مدلدلة
من رقبتة وهو دلدول
وهيضيع الغريب فى البلد دى
بين حق اتسلب وحق مأكول
وبين موظف يقبحلك الصبحية
ومنافق يشبعك كلام كعسول
وخناقات ماشية والنبوت فيها
عامل زى سيف بالشر مسلول
وهيضيع ما بين رقاصة معبودة
وعالم داير فى البلاد مجهول
ورجالة طويلة من هيافتها
ما يصدقها عقل ولا معقول
ولو شاف الشحاتين فى بلدنا
يستغرب من الشحات اللى قد الغول
رابط ايدية بخيشة ولا هدمة
وماشى يشحت والغريب مذهول
وتقول لمين وتشكى لمين
ياعم ده العقل بالترباس مقفول
أحمد الصباغ
No comments:
Post a Comment